'निम्म्या वयाच्या मुलीशी लग्न केलेलं चालतं, पण मी...', डेटिंग लाइफमुळे ट्रोल होणाऱ्या मलायकाचा पारा सुटला! Ex पतीला मारला टोमणा

मुंबई: अभिनेत्री मलायका अरोरा अनेक वर्षांपासून तिच्या खासगी आयुष्यामुळे आणि धाडसी निर्णयामुळे टीकेची धनी होत आहे. पण आता तिने तिच्या घटस्फोटाच्या निर्णयावर समाजाने दिलेल्या प्रतिक्रियेबद्दल उघडपणे आणि अत्यंत जहरी भाष्य केले आहे. पुरुषांना प्रत्येक बाबतीत मिळणाऱ्या स्वातंत्र्याबद्दल समाजाच्या मानसिकतेवर तिने बोट ठेवलं आहे.

मलायका अरोराने अगदी तरुण वयातच आपल्या करिअरला सुरुवात केली. एमटीव्हीवरील व्हीजे म्हणून प्रसिद्ध झाल्यानंतर, १९९८ मध्ये आलेल्या 'छैय्या छैय्या' गाण्यामुळे ती एका रात्रीत 'सेंसेशन' बनली. त्याच वर्षी तिने अभिनेता अरबाज खानशी लग्न केले.

१९ वर्षांच्या संसारानंतर, २०१७ मध्ये त्यांनी वेगळे होण्याचा निर्णय घेतला. त्यांनी हा निर्णय खाजगी ठेवला, पण यामुळे लोकांच्या नजरेत मलायकाची प्रतिमा बदलली.

घटस्फोटानंतर अरबाजने जॉर्जिया डेट केले आणि नंतर शूरा खानशी लग्न केले, तर मलायकाचे अर्जुन कपूरसोबतचे नाते सतत चर्चेत राहिले. दोघांमधील वयाचा फरक आणि मलायकाचे आयुष्य यावर लोकांनी टीका केली होती.

नुकतंच, बरखा दत्त यांच्या 'मोजो स्टोरी'ला दिलेल्या मुलाखतीत मलायकाने तिच्यावर होणाऱ्या टीकेबद्दल स्पष्टपणे भाष्य केले आहे. मलायका म्हणाली, "आज जर एखाद्या पुरुषाने पुढे जाण्याचा निर्णय घेतला, घटस्फोट घेतला, स्वतःच्या निम्म्या वयाच्या व्यक्तीशी लग्न केले, तर लोक म्हणतात, 'वाह! काय माणूस आहे!'"

"पण जेव्हा एखादी महिला असे करते, तेव्हा तिच्यावर प्रश्न उपस्थित केले जातात, 'तिला हे करण्याची काय गरज होती? तिला अक्कल नाही का?' सतत हेच दुहेरी मापदंड पाहायला मिळतात," अशा शब्दांत तिने समाजाला सुनावले.

मलायकाने २५ व्या वर्षी लग्न केले तेव्हा तिच्या आईची प्रतिक्रिया काय होती, हेही तिने सांगितले. "माझी आई नेहमी म्हणायची, 'बाहेर जा, तुझ्या आयुष्याचा आनंद घे आणि तू ज्या पहिल्या मुलाला डेट करत आहेस, त्याच्याशी लग्न करू नकोस.' पण मी नेमके तेच केले. मी पहिल्याच व्यक्तीशी लग्न केले," असे मलायका म्हणाली.

आईने मला नेहमीच मोठी स्वप्ने पाहण्यासाठी आणि आयुष्य जगण्यासाठी प्रोत्साहन दिले, तिने कधीही आम्हाला कशापासून थांबवले नाही, असेही तिने सांगितले.