भयंकर अपघात, तोंडावर 62 टाके; थोडक्यात वाचली होती क्रांती रेडकर, केदार शिंदेंनी सांगितला अंगावर काटे आणणारा प्रसंग

मराठी सिनेसृष्टीत अनेक अजरामर चित्रपट होऊन गेले, ज्यांनी प्रेक्षकांच्या मनावर एक वेगळीच छाप सोडली. असाच एक चित्रपट म्हणजे 'जत्रा'. केदार शिंदे दिग्दर्शित या सिनेमामध्ये मोठी स्टार कास्ट पाहायला मिळाली.

भरत जाधव, सिद्धार्थ जाधव, क्रांती रेडकर, प्रिया बेर्डे, विजय चव्हाण, विजू खोटे यांसारख्या कलाकारांच्या जबरदस्त अभिनयाने या चित्रपटात आणखीनच रंगत आणली.

२००६ साली रिलीज झालेल्या या चित्रपटाला पुढच्या वर्षी २० वर्षे पूर्ण होणार आहेत. अशातच या चित्रपटाच्या स्टार कास्टने नुकतंच एक खास मुलाखत दिली आहे.

एका खास मुलाखतीत दिग्दर्शक केदार शिंदे यांनी या सिनेमाबद्दल जुन्या आठवणी आणि काही किस्सेही शेअर केले आहेत. यावेळी केदार शिंदे यांच्यासह प्रिया बेर्डे, सिद्धार्थ शिंदे, क्रांती रेडकर आणि भरत जाधवही उपस्थित होते.

दरम्यान, यावेळी केदार शिंदे यांनी असा एक किस्सा सांगितला, जो ऐकून प्रत्येकालाच धक्का बसला. केदार यांनी क्रांती रेडकरबद्दल एक धक्कादायक खुलासा केला.

ते म्हणाले, "चित्रपटाचं शूटिंग सुरू असताना एके दिवशी मुसळधार पाऊस पडत होता. त्यामुळे त्यांनी त्या दिवशी शूटिंग थांबवण्याचा निर्णय घेतला. त्यावेळी शूटिंग रद्द झाल्यामुळे काहीजणांनी पाचगणीला जाण्याचा प्लान केला आणि एक गाडी त्या दिशेने निघाली. त्या गाडीमध्ये क्रांती रेडकरही होती. केदार यांना याबद्दल माहिती मिळताच, त्यांनी क्रांतीला परत बोलावण्यासाठी निरोप पाठवला. त्यानुसार एक गाडी क्रांतीला परत आणण्यासाठी निघाली."

केदार यांनी पुढे सांगितलं, "पाचगणीच्या अर्ध्या वाटेत असताना क्रांती निरोप पाठवलेल्या गाडीत बसून परत मागे फिरली आणि पहिली गाडी पुढे निघाली. मात्र, घाटात असतानाच पाचगणीला जाणाऱ्या गाडीचा भयानक अपघात झाला आणि गाडीतील प्रत्येक व्यक्ती गंभीररित्या जखमी झाला. क्रांती रेडकरच्या जागी बसलेल्या व्यक्तीच्या चेहऱ्यावर ६२ टाके घालण्यात आले होते."

केदार शिंदे यांनी सांगितलं की त्या व्यक्तीच्या जागी जर क्रांती असती तर पहिल्याच चित्रपटानंतर तिचं करिअर संपलं असतं. क्रांतीही म्हणाली, "जर माझ्या चेहऱ्यावर ६२ टाके घालण्यात आले असते, तर माझा पहिलाच चित्रपट माझा शेवटचा चित्रपट ठरला असता. पण माझ्या जागेवर असलेला व्यक्ती जेव्हा शुद्धीवर आला, तेव्हा तो माझ्या तब्येतीची विचारणा करत होता. त्याच्या चेहऱ्यावर आजही ते व्रण आहेत."