मंत्र जप, देवाचं नामस्मरण आणि सतत हनुमान चालीसा पठण, प्रेग्नन्सीनंतर परिणीती चोप्रासोबत असं काय घडत होतं?

परिणीती चोप्रा मुलगा नीरच्या जन्मानंतर पोस्टपार्टम डिप्रेशनचा सामना करत होती. याबाबत अभिनेत्रीने आता मोकळेपणाने भाष्य केलं आहे. मुलाच्या जन्मानंतर डिप्रेशनचा सामना करत असताना परिणीतीने देवाच्या नामस्मरणाचा आधारा घेतला.

परिणीती म्हणाली की, ती डिप्रेशनमधून जात होती आणि अशा कठीण काळात तिने देवाच्या नामस्मरणाचा आधार घेतला. परिणीती चोप्रा सांगते की ती दररोज सकाळी उठून हनुमान चालीसा वाचत असे आणि मंत्रजपाच्या मदतीने स्वतःला सकारात्मक ठेवण्याचा प्रयत्न करत असे.

‘इश्कजादे’ या चित्रपटाच्या माध्यमातून करिअरची सुरुवात करणाऱ्या परिणीती चोप्राने सुमारे दोन महिन्यांपूर्वी पती राघव चड्ढा यांच्यासोबत आपल्या पहिल्या बाळाचे स्वागत केले.

आई झाल्यानंतर आपण पोस्टपार्टम डिप्रेशनशी झुंज देत असल्याचे परिणीतीने नुकतेच सांगितले. तसेच या अवस्थेतून बाहेर पडण्यासाठी तिने कोणते उपाय केले, हेही तिने शेअर केले. परिणीती सांगते की ती सकाळी उठताच सर्वप्रथम देवाचे नाव घेत असे आणि शक्यतो मोबाईल फोन वापरणे टाळत असे.

दोन महिन्यांपूर्वी मुलगा नीरची आई झालेल्या परिणीतीने आपल्या यूट्यूब चॅनेलवर एक व्हिडीओ शेअर केला आहे. या व्हिडीओमध्ये तिने मन शांत ठेवण्याचे आणि स्वतःला रिलॅक्स ठेवण्याचे मार्ग सांगितले आहेत. परिणीतीच्या मते, दिवसाची सुरुवात योग्य पद्धतीने करणे खूप महत्त्वाचे आहे. तिने सांगितले की सकाळी उठताच मोबाईल फोन वापरणे टाळावे, कारण त्यामुळे मेंदूवर ताण येतो.

परिणीती म्हणाली,"जर तुमचे मन सकारात्मक असेल, तर शरीरही तसाच प्रतिसाद देते. आजकाल बहुतांश लोक डोळे उघडताच फोन हातात घेऊन स्क्रोलिंग सुरू करतात, ही सगळ्यात वाईट सवय आहे. यामुळे मेंदू सुन्न होतो आणि संपूर्ण दिवसावर त्याचा वाईट परिणाम होतो.” पुढे ती सांगते की ती सकाळी फोनपासून दूर राहून स्वतःसाठी वेळ काढते.

परिणीती पुढे म्हणते, “जर तुम्ही सकाळी उठून फोनकडे दुर्लक्ष केले, थोडा वेळ शांत बसलात, संगीत ऐकले, निसर्गाच्या जवळ गेलात, पक्ष्यांचे आवाज ऐकले, तर मन आपोआप शांत होते. मी सकाळी उठताच मंत्रजप करते. कधी हनुमान चालीसा, तर कधी ‘नमामि शमीशम’चा पाठ करते. माझा दिवस याच सकारात्मक ऊर्जेसोबत सुरू व्हावा, अशी माझी इच्छा असते.”