'मला आणि माझ्या पत्नीला काही झालं तर...' 10 वर्षांची मेहनत एका रात्रीत हिरावून घेतली, सोशल मिडिया अकाऊंट्स सस्पेंडनंतर 'प्रसिका'ची पोस्ट

सोशल मीडियाच्या जगात असे फार कमी क्रिएटर्स आहेत ज्यांनी आपली ओळख निर्माण केली आणि ती कायम टिकवून ठेवली. त्यातील एक क्रिएटर जोडी म्हणजे प्रसाद आणि दीपिका वेदपाठक. गेली 10 हून अधिक वर्ष प्रसाद आणि दीपिका कॉन्टेन्ट क्रिएशन करत आहेत.

पण अचानक प्रसाद आणि दीपिका यांचे इन्स्टाग्राम अकाऊंट सस्पेंड करण्यात आले. इन्स्टाग्राम आणि मेटा यांच्याकडून त्यांना कोणत्याही प्रकारचं नोटिफिकेशन न देता त्यांच्या 10 वर्षांच्या अफाट मेहनतीवर पाणी फिरवलं.

प्रसाद आणि दीपिका यांनी अकाऊंट्स सस्पेंड झाल्यानंतर व्हिडीओ शेअर करत मेटा आणि इन्स्टाग्रामला विनंती देखील केली. मात्र मागील तीन चार दिवसांपासून मेटा आणि इन्स्टाग्रामकडून कोणतीही मदत मिळालेली नाही. या संपूर्ण प्रकारादरम्यान प्रसाद वेदपाठक याने एक्सवर एक पोस्ट शेअर केली जी व्हायरल होतेय.

प्रसादनं लिहिलंय, "जर माझ्या किंवा माझ्या पत्नीबाबत काहीही घडलं तर कोणतीही पूर्वसूचना न देता आमची सर्व अकाउंट्स एकाच वेळी सस्पेंड केल्याबद्दल फक्त Instagram आणि Meta जबाबदार असतील. आम्हाला अपील करण्याची किंवा आमची बाजू मांडण्याची संधीही देण्यात आली नाही. अनेक दशकांची मेहनत एका क्षणात पुसून टाकल्यासारखी झाली."

याआधी देखील प्रसादने पोस्ट लिहिली होती. ज्यात त्याने लिहिलं होतं, "आम्ही आजवर कधीही कम्युनिटी गाईडलाईन्सचे उल्लंघन केलेलं नाही. आमची सर्व व्हेरिफाईड अकाऊंट्स अचानक गायक झाली आहे. ही आमची दहा वर्षांची मेहनत आहे जी एका रात्रीत हिरावून घेतली गेली."

प्रसाद आणि दीपिका यांची सुरुवात UIC या युट्यूब व्लॉगमधून झाली होती. टिकटॉकच्या काळातही ते प्रचंड लोकप्रिय होते. टिक टॉक बंद झाल्यानंतर त्यांनी इन्स्टाग्रामवर प्रसिका नावाने अकाऊंट सुरू केलं ज्यात त्याला प्रचंड लोकप्रियता मिळता. प्रसिका या चॅनेलवर कुकींग व्हिडीओ ते शेअर करत होते. मार्केटिंग क्षेत्रातही त्यांनी मोठं नाव कमावलं.

आज प्रसाद आणि दीपिका यांच्या सोशल मिडिया अकाऊंट्स सस्पेन्ड केल्याप्रकरणी त्यांचे अनेक फॅन्स त्यांच्या पाठीशी उभे राहिले आहेत. सोशल मीडियावर Bring Back Prasika असा हॅशटॅग वापरून फॅन्स त्यांना सपोर्ट करत आहेत.