'घोडेबाजारात जाऊन घोडे घेतल्यासारखं...' महेश मांजरेकर घेत नाहीत कलाकारांचं ऑडिशन, स्पष्टच सांगितलं कारण

मुंबई: मराठी सिनेसृष्टीच्या अष्टपैलू व्यक्तिमत्त्वापैकी एक असलेले दिग्दर्शक महेश मांजरेकर हे त्यांच्या स्पष्टवक्तेपणामुळे नेहमीच चर्चेत असतात. नुकताच त्यांचा 'पुन्हा शिवाजीराजे भोसले' हा चित्रपट प्रदर्शित झाला, ज्यात सिद्धार्थ बोडकेने महाराजांची भूमिका साकारली आहे.

सिद्धार्थची निवड करताना त्यांना अनेकांनी विरोध केला होता, पण मांजरेकर आपल्या निर्णयावर ठाम राहिले. आता एका मुलाखतीत त्यांनी कलाकारांच्या कास्टिंगबद्दल स्पष्ट मत मांडले आहे.

'लेट्सअप'ला दिलेल्या मुलाखतीत मांजरेकर यांनी त्यांच्या मनातली गोष्ट बोलून दाखवली. ऑडिशन घेण्याबद्दल बोलताना त्यांनी घोडेबाजाराची उपमा वापरली. मांजरेकर म्हणाले, "मला ऑडिशन घ्यायला आवडत नाही. कारण ते मला घोडेबाजारात जाऊन घोडे घेतल्यासारखं वाटतं!"

त्यांच्या मते, एखादा कलाकार ऑडिशनमध्ये चांगला परफॉर्मन्स करेल, पण तो भूमिकेमध्येही तेवढाच दमदार असेल, याची गॅरंटी नसते. म्हणूनच ते केवळ ऑडिशन घेण्यापेक्षा माणसाची पॉवर ओळखण्याला अधिक महत्त्व देतात.

मग मांजरेकर कलाकारांची निवड कशी करतात? याबद्दल बोलताना ते म्हणाले की, ते नेहमी त्यांच्या इंस्टिंक्टनुसार निर्णय घेतात. सिद्धार्थ बोडकेच्या निवडीबद्दल बोलताना मांजरेकर म्हणाले, "मी त्याचे फार काम पाहिले नव्हते, पण तो नाटकात काम करायचा, हे माहीत होते. मी त्याला पहिल्यांदा भेटलो आणि त्याला बघितल्यावर माझ्या मनात लगेच आले की, हा मुलगा छत्रपती शिवाजी महाराजांची भूमिका उत्तम साकारेल." त्यांच्या मते, माणसाची एक पॉवर असते आणि त्यांना सिद्धार्थमध्ये ती पॉवर जाणवली.

मांजरेकर म्हणतात, त्यांच्या दृष्टीने अभिनयाच्या कौशल्यापेक्षा आत्मविश्वास अधिक महत्त्वाचा आहे. मांजरेकरांनी सांगितले की, जर एखाद्या कलाकाराला त्यांनी भूमिकेची ऑफर दिली आणि त्या कलाकाराने त्यांना लगेच विचारले की, "तुम्हाला वाटतं का की, मी ही भूमिका करू शकेन?" तर ते त्याला सांगतात, "तू घरी जा! मला वाटून उपयोग नाही, तुला स्वतःला वाटले पाहिजे की तू ती भूमिका साकारू शकतोस."

अखेरीस, मांजरेकर यांनी केवळ त्यांच्या मनाचे ऐकून सिद्धार्थ बोडकेला संधी दिली आणि त्यांच्या या निर्णयाचे आता सर्वत्र कौतुक होत आहे.