राम गोपाल वर्मांच्या एका नजरेने बदललं 'या' मराठी मुलीचं नशीब; रातोरात बनली 'हॉट सेन्सेशन'

भारतीय चित्रपटसृष्टीच्या इतिहासात काही दिग्दर्शक असे असतात ज्यांना 'माणूस पारखण्याची' विलक्षण दृष्टी असते. विशेषतः 90 च्या दशकात एका दिग्दर्शकाने बॉलिवूडमध्ये क्रांती आणली होती. तो दिग्दर्शक म्हणजे राम गोपाल वर्मा (RGV). वर्मा यांच्या सिनेमात काम करणं म्हणजे केवळ अभिनयाची संधी नव्हती, तर प्रेक्षकांच्या मनावर राज्य करण्याची गुरुकिल्ली होती. अशीच एक मध्यमवर्गीय मराठी मुलगी, जिने बालकलाकार म्हणून आपल्या करिअरची सुरुवात केली होती, पण तिला खरी ओळख आणि 'हॉट सेन्सेशन' मिळवून दिलं ते राम गोपाल वर्मा यांच्या एका निर्णयाने.

सुरुवातीच्या काळात ही अभिनेत्री अतिशय साध्या, लाजाळू आणि साईड कॅरेक्टर म्हणून काम करत होती. 'मासूम' सारख्या चित्रपटातून बालकलाकार म्हणून ती सर्वांसमोर आली होती. पण तरुणपणी तिला हवी तशी ओळख मिळत नव्हती. त्याच काळात दाक्षिणात्य सिनेसृष्टीतून आलेल्या एका दिग्दर्शकाची नजर तिच्यावर पडली. तो दिग्दर्शक होता राम गोपाल वर्मा. वर्मा यांना तिच्या डोळ्यांत एक वेगळीच चमक दिसली, जी त्या काळातील ग्लॅमरस अभिनेत्रींमध्येही नव्हती.

आणि मग उजाडला तो दिवस, ज्याने हिंदी सिनेसृष्टीची परिभाषाच बदलली. तो चित्रपट होता 'रंगीला' (1995). हो, आम्ही बोलतोय मराठी मनावर राज्य करणाऱ्या उर्मिला मातोंडकर बद्दल

'रंगीला'च्या आधी उर्मिलाकडे एक गुणी अभिनेत्री म्हणून पाहिलं जायचं, पण राम गोपाल वर्मांनी तिला ज्या प्रकारे मोठ्या पडद्यावर सादर केलं, ते पाहून प्रेक्षक अवाक झाले. 'तनहा तनहा' गाण्यातील तिचा समुद्रकिनाऱ्यावरील तो बोल्ड अवतार असो किंवा 'रंगीला रे' मधील तिची कमालीची ऊर्जा, उर्मिला एका रात्रीत 'नॅशनल सेन्सेशन' बनली. राम गोपाल वर्मा यांनी तिच्यातील केवळ सौंदर्यच नाही, तर तिची स्टाईल आणि नृत्याची आवड ओळखून तिला पूर्णपणे 'ट्रान्सफॉर्म' केलं.

केवळ ग्लॅमरच नाही, तर राम गोपाल वर्मा यांनी उर्मिलाला 'सत्या' मधील 'विद्या' ही साधीसुधी व्यक्तिरेखा देऊन तिच्या अभिनयाची खोलीही जगाला दाखवून दिली. 'कौन' मधील तिची सायकोटिक भूमिका असो किंवा 'भूत' मधील घाबरलेली स्त्री, उर्मिलाने प्रत्येक पात्रात प्राण ओतले. राम गोपाल वर्मा आणि उर्मिला यांची जोडी त्या काळी इतकी चर्चेत आली होती की, उर्मिला त्यांच्या प्रत्येक मोठ्या प्रोजेक्टचा अविभाज्य भाग बनली. 'मस्त' आणि 'जंगल' सारख्या चित्रपटातून उर्मिलाने आपली 'हॉट' इमेज कायम ठेवत सिनेसृष्टीवर अधिराज्य गाजवलं.

'हॉट सेन्सेशन'मागचं गुपितराम गोपाल वर्मा यांच्याबद्दल असं म्हटलं जातं की, त्यांना उर्मिलाच्या प्रतिभेवर प्रचंड विश्वास होता. मनीष मल्होत्राची वेशभूषा, राम गोपाल वर्मा यांची कॅमेऱ्याची नजर आणि उर्मिलाचे एक्सप्रेशन्स या त्रिकुटाने 90 च्या दशकातील प्रेक्षकांना वेड लावलं होतं. 'रंगीला'च्या यशानंतर उर्मिला ही केवळ एक अभिनेत्री राहिली नाही, तर ती एक 'ब्रँड' बनली.

आजही जेव्हा राम गोपाल वर्मा यांच्या सर्वोत्कृष्ट चित्रपटांची चर्चा होते, तेव्हा उर्मिला मातोंडकरचं नाव सर्वात आधी घेतलं जातं. एका साध्या मराठी मुलीला जागतिक दर्जाचं ग्लॅमर मिळवून देण्यात राम गोपाल वर्मा यांचा मोठा वाटा आहे, हे नाकारता येणार नाही. उर्मिलानेही आपल्या मेहनतीने हे सिद्ध केलं की, तिला मिळालेलं 'सेन्सेशन' हे केवळ नशिबाने नाही, तर तिच्यातील कौशल्यामुळे मिळालं होतं.