'सचिन आणि माझ्या अफेअरच्या चर्चा... ', 43 वर्षांनी महागुरूंच्या सुपरहिट सिनेमातील हिरोईनचा मोठा खुलासा

मुंबई: आजकालच्या चित्रपटांत फक्त मारामारी, रक्ताचा सडा आणि शिवराळ भाषा यांचाच बोलबाला असतो. पण एक काळ असा होता, जेव्हा संपूर्ण कुटुंब एकत्र बसून चित्रपट पाहायचं. अशाच एका सुवर्णकाळाची साक्ष देणारा चित्रपट म्हणजे १९८२ मध्ये आलेला 'नदिया के पार'.

या सिनेमाने केवळ इतिहासच रचला नाही, तर तब्बल ४३ वर्षांनंतरही आजही यातील 'गुंजा आणि चंदन'ची जोडी प्रेक्षकांच्या मनावर राज्य करतेय. याच निमित्ताने अभिनेत्री साधना सिंग यांनी सचिन पिळगांवकर आणि त्यांच्या नात्याबद्दल काही गोष्टी सांगितल्या आहेत.

नुकत्याच दिलेल्या एका मुलाखतीत साधना यांनी जुन्या आठवणींना उजाळा दिला. त्या म्हणाल्या, "नदिया के पार'च्या आधीच सचिन एक मोठे स्टार होते. मी जेव्हा मुंबईत नवीन होते, तेव्हा एका कार्यक्रमात आमची भेट झाली होती. पुढे जेव्हा या सिनेमासाठी माझी निवड झाली, तेव्हा सचिनना माहीत नव्हतं की हिरोईन कोण आहे. माझा फोटो पाहताच ते म्हणाले, 'अरे, ही तर साधना! मी हिला ओळखतो.'"

साधना पुढे सांगतात की, "आमची मैत्री इतकी घट्ट होती की लोकांनी आमच्या अफेअरच्या अफवा उडवायला सुरुवात केली. पण आमच्यात केवळ निखळ मैत्री होती. मात्र, एका तिसऱ्या व्यक्तीने आमच्या मैत्रीत विष कालवलं. त्या व्यक्तीमुळे सचिन माझ्या पतीपासून आणि कालांतराने माझ्यापासूनही दुरावले. आजही आम्ही भेटलो की ते प्रेमाने बोलतात, पण ती जुनी मैत्री आता उरलेली नाही."

'नदिया के पार' हा चित्रपट बॉक्स ऑफिसवर सुपरहिट होता. अवघ्या १८ लाख रुपयांमध्ये बनलेल्या या चित्रपटाने तब्बल ५.४ कोटी रुपये कमावले होते. म्हणजेच आपल्या खर्चाच्या जवळपास ३० ते ४० पट अधिक कमाई करून या सिनेमाने बॉलिवूडला हादरवलं होतं. आजही 'IMDb' वर या सिनेमाला ८.२ रेटिंग आहे, जे आजही अनेक मोठ्या चित्रपटांना मिळत नाही.

'कौन दिशा में लेके चला रे बटोहिया' किंवा 'जोगी जी धीरे धीरे' ही गाणी आजही लग्नकार्यात किंवा प्रवासात आवर्जून ऐकली जातात. याच कथेवर आधारित पुढे सूरज बडजात्या यांनी 'हम आपके हैं कौन' बनवला. सलमान खान आणि माधुरी दीक्षितच्या त्या ब्लॉकबस्टर सिनेमाचं मूळ 'नदिया के पार'मध्येच होतं.