नियम धाब्यावर बसवले का? लिलावतीमध्ये सिटिस्कॅनसाठी नकार, अखेर सोडावा लागला शो; 8 वर्षांनी अभिनेत्याचा बिग बॉसला सवाल

बिग बॉस मराठी 6 सध्या जोरदार सुरू आहे. अनेक कलाकार मंडळी देखील यावर अनेक प्रतिक्रिया देत आहेत. बिग बॉसचे एक्स स्पर्धक देखील यंदाच्या सीझनवर बोलत आहेत. अशातच बिग बॉस मराठी सीझन 1 चा स्पर्धक सुशांत शेलार याने प्रतिक्रिया देत बिग बॉसलाच प्रश्न विचारला आहे.

सुशांत शेलार सीझन 1 मध्ये उत्तम खेळत होता. मात्र प्रकृतीच्या कारणामुळे त्याला शो सोडावा लागला. जवळपास 8 वर्षांनी सुशांत शेलार याने घरातून बाहेर पडताना नेमकं काय झालं होतं? त्याला शो सोडण्याचा निर्णय का घ्यावा लागला याबद्दल सांगत बिग बॉसला प्रश्न विचारले आहेत.

राजश्री मराठीशी बोलताना सुशांत शेलार म्हणाला, "मी बिग बॉसच्या घरात जाऊन आलोय, त्यामुळे इतर स्पर्धक कसे आहेत कसे खेळत आहेत हे जाणून घेण्यासाठी थोडा वेळ का होईना, शो पाहतो. पहिला सिझन कसा होता आणि तो किती लोकप्रिय झाला हे महाराष्ट्राला माहित आहे. माझ्या नंतरचे सिझन कसे होते आणि त्याचे रेटिंग काय आहेत हे मी बोलण्याची गरज नाही."

सुशांत पुढे म्हणाला, "मला शोमध्ये नियम दाखवले. सर्व गोष्टी काटेकोरपणे पाळाव्या लागतात. तुला लिलावतीला जाऊन सिटी स्कॅन करता येणार नाही. तुला लोणावळा सिटी सोडता येणार नाही, असे नियम दाखवून मला तो शो सोडावा लागला. त्याच्यानंतर इतर सिझन्समध्ये बरीच लोकं जात होते, येत होते. मग तेव्हा का नियम धाब्यावर बसवले?"

सध्या सुरू असलेल्या सीझनवरून सुशांतचे बिग बॉसला टोमणा देखील मारला. तो म्हणाला, "या सिझनमध्ये मला टास्कच दिसत नाहीत. स्पर्धक एकतर पोहे खात असतात, चिप्स खात असतात किंवा भांडत असतात."

"पहिल्या सिझनमध्ये तर आम्हाला साखर, कॉफी यासाठी भीक मागायला लागायची. पोहे तर दूरची गोष्ट आहे आणि कपडे पण आम्ही हाताने धुवायचो. वॉशिंग मशिन नव्हती. आमच्यावेळी नियम कडक होते. त्यानंतर कदाचित त्यांना स्पर्धक तितके स्ट्राँग मिळाले नसतील जे कडक नियम पाळू शकतील".

बिग बॉस मराठी 1 मध्ये अनेक मराठी कलाकार सहभागी झाले होते. मराठी बिग बॉसच्या सीझनमध्ये पहिला सीझन हा हिट सीझन मानला जातो. अभिनेत्री मेघा धाडे या सीझनची विजेती ठरली होती.