'त्यांची मुलं आणि आईवडील अतिशय...', शाहरुख खानच्या मन्नतमध्ये गेल्यावर गिरिजा ओकला आलेला शॉकिंग अनुभव

मुंबई: सध्या प्रत्येकाच्या तोंडी मराठमोळी अभिनेत्री गिरिजा ओकचं नाव आहे. एका मुलाखतीतील तिचे निळ्या साडीतील फोटो व्हायरल झाले आणि रातोरात ती सोशल मीडिया सेन्सेशन बनली. इतकंच नाही, तर नेटकऱ्यांनी तिला थेट नॅशनल क्रश बनवून टाकलं.

गिरिजाने केवळ मराठीमध्येच नाही, तर बॉलिवूडमध्येही आपल्या अभिनयाची छाप सोडली आहे. विशेष म्हणजे गिरिजाने बॉलिवूडच्या तीन खानपैकी दोन, आमिर खान आणि शाहरुख खान यांच्यासोबत स्क्रीन शेअर केली आहे.

गिरिजाने आमिर खानसोबत तारे जमीन पर आणि शाहरुख खानसोबत जवान या चित्रपटांमध्ये काम केलं आहे. शाहरुख खानचा ब्लॉकबस्टर चित्रपट 'जवान' मध्ये तिने शाहरुखच्या 'आझाद'च्या टीममधील सदस्य म्हणून काम केले.

दरम्यान, या चित्रपटात शाहरुखसोबत काम करण्याच्या अनुभवाबाबत गिरिजा भरभरून बोलली होती. तिने केवळ शाहरुखच्या कामाबद्दलच नाही, तर तो किती चांगला व्यक्ती आहे याबाबतही मोठा खुलासा केला.

'जवान'च्या सेटवर काम करताना गिरिजाला शाहरुखच्या कामाची विलक्षण पद्धत आणि त्याच्या कलागुणांची प्रचिती आली. लालनटॉपला दिलेल्या एका मुलाखतीत गिरिजा ओकने सांगितले, "शाहरुख सर इतरांच्या कामात अजिबात हस्तक्षेप करत नाहीत, पण त्यांच्या स्वतःच्या कामाबद्दल ते अत्यंत जागरूक असतात. त्यांची ॲक्शन कंटिन्यूटी खूप अचूक असते. इतक्या वर्षांत मी कोणत्याही अभिनेत्यात एवढं परफेक्शन पाहिलेलं नाही."

गिरिजाने पुढे सांगितलं, "शाहरुखला त्याची ॲक्शन कंटिन्यूटी १००% आठवते. मागील शॉटमध्ये त्याने कोणता हात कुठे ठेवला, मानेची स्थिती कशी होती, हे त्यांना कोणीही आठवण करून द्यावी लागत नाही. 'जवान'मध्ये ते दुहेरी भूमिका करत असल्याने, ही गोष्ट अधिक महत्त्वाची होती, पण ते कधीही विसरले नाहीत, हे खरोखरच विलक्षण आहे."

'जवान'चे शूटिंग पूर्ण झाल्यावर शाहरुख खानने मुंबईतील त्याच्या मन्नत बंगल्यावर पार्टी आयोजित केली होती. 'मन्नत'वरील पार्टीत जाणे हा गिरिजासाठी एक अविस्मरणीय अनुभव होता. गिरिजाने सांगितले की, शूटिंगदरम्यान दोघांनीही आपल्या मुलांची आठवण काढत पालकांच्या वेदनांबद्दल गप्पा मारल्या.

मन्नतमध्ये पोहोचल्यावर गिरिजाला जाणवले की, शाहरुखचे कुटुंब कोणत्याही सामान्य कुटुंबासारखेच अतिशय प्रेमळ आणि एकसंध आहे. "गौरी, आर्यन आणि सुहाना एकत्र डान्स करत होते आणि एकमेकांसाठी गाण्यांची फर्माईश करत होते.

गौरीचे आई-वडील तिथे बसून गप्पा मारत होते. ते अगदी कोणत्याही साध्या, प्रेमळ कुटुंबासारखे होते," असे गिरिजाने सांगितले. 'जवान'ने जगभरात १००० कोटींहून अधिकचा व्यवसाय करून इतिहास रचला होता.