हातातला हात सुटला, कुंकवाचा धनी गेला! सुप्रिया ताईंनी सावरलं, पण सुनेत्रा वहिनींचा हुंदका काळजाला आरपार चिरून गेला, PHOTO

"ज्या हातांनी अनेक वर्ष बारामतीचा विकास सावरला, ज्या शब्दांनी अनेकांना उभं केलं, आज तोच आधार कायमचा निखळला होता. अजित दादांच्या पार्थिवाकडे पाहताना केवळ बारामतीकरच नाही, तर महाराष्ट्राच्या मातीतील प्रत्येक डोळा पाणावला होता. पण यात सर्वात जास्त दु:ख पत्नी सुनेत्रा यांच्या वाट्याला आलं. हातातील हात सुटला होता आणि आयुष्याचा जोडीदार कायमचा निघून गेला होता.

थरथरत्या पावलांनी, डोळ्यांत अश्रूंचा पूर घेऊन वहिनी जेव्हा दादांच्या पार्थिवासमोर उभ्या राहिल्या, तेव्हा तिथला दगडही रडला असेल. अशा वेळी नणंद सुप्रिया सुळे एखाद्या खंबीर भिंतीसारख्या आपल्या वहिनीच्या पाठीशी उभ्या होत्या.

वहिनींना सावरत त्यांनी दादांच्या अंतिम दर्शनासाठी नेलं. सुनेत्रा वहिनींनी थरथरत्या हातांनी दादांना शेवटचं पाणी दिलं, नमस्कार केला... हा तो क्षण होता जिथे राजकारण संपलं होतं आणि फक्त एक तुटलेलं नातं उरलं होतं."

महाराष्ट्राचे उपमुख्यमंत्री अजित पवार यांचं विमान अपघातामध्ये निधन झालं. बुधवारी सकाळी 8.45 च्या सुमारास विमान कोसळून दुर्घटना घडली. या दुर्घटनेत उपमुख्यमंत्री अजित पवार याचं निधन झाल्यानं महाराष्ट्रावर शोककळा पसरली. आज अजित पवार यांच्या पार्थिवावर बारामतीमध्ये अंत्यसंस्कार करण्यात आले.

सुनेत्रा पवार यांना जेव्हा ही बातमी समजली तेव्हा त्या दिल्लीमध्ये होत्या. त्या तातडीनं दिल्लीहून बारामतीमध्ये पोहोचल्या. काटेवाडीत देखील त्या दादांच्या पार्थिवाजवळ होत्या. अखेरचा निरोप देईपर्यंत धीर सुटला तरी थांबल्या होत्या.

अजित पवार यांच्या निधनाच्या बातमीनं संपूर्ण पवार कुटुंबच नाही तर महाराष्ट्रातल्या गावागावातली लोक हळहळली आहेत. लाखोंचा जनसागर त्यांना निरोप देण्यासाठी आज बारामतीमध्ये उपस्थित होता. शेवटचं पाहण्यासाठी आणि अखेरचा निरोप देण्यासाठी थरथरत्या पावलांनी पत्नी सुनेत्रा पवारही उपस्थित होत्या.

हात पाय थरथरत होते, अश्रू थांबत नव्हते, पतीची साथ सुटली या विचारानं मनात काहूर माजला होता. सुप्रिया सुळे यांनी सुनेत्रा पवार यांना सावरलं. अंतिम दर्शन घेण्यासाठी त्यांना अजित पवार यांच्या पार्थिवाजवळ नेलं. सुनेत्रा पवार यांनी त्यांना शेवटचं पाणी दिलं, नमस्कार केला. घरातला, आयुष्यातला एक सगळ्यात मोठा आधार असलेला माणूस गेला. त्यांना सुप्रिया सुळेंनी सावरलं.

सुनेत्रा पवार यांनी मुलालाही घट्ट मिठी मारली. अत्यंत भावुक करणारा क्षण होता. दोन्ही मुलांनी अखेर मुखाग्नी दिला आणि जनसागरासमोर हात जोडले. या जनसागराचं दादांवर असलेलं प्रेम संपूर्ण महाराष्ट्रानं पाहिलं. सुनेत्रा पवारही यावेळी भावुक झाल्या होत्या.