Weather Alert: महाराष्ट्रात वारं फिरलं, मराठवाड्यात पुन्हा कोसळणार, शनिवारी 6 जिल्ह्यांना अलर्ट

गेल्या काही दिवसांपासून राज्यातील हवामानात मोठे बदल जाणवत आहेत. ऑक्टोबरच्या सुरुवातीलाच काही भागात पावसाने उघडीप घेतली असली, तरी काही ठिकाणी मात्र वेगळीच स्थिती आहे. विदर्भ, मराठवाड्यासह मध्य महाराष्ट्रातील 15 जिल्ह्यांना शनिवारी यलो अलर्ट देण्यात आला आहे. मराठवाड्यातील पुढील 24 तासांचा हवामान अंदाज जाणून घेऊ.

सप्टेंबरअखेर पावसाळा संपून ऑक्टोबरला थंडीची चाहुल लागते. मराठवाड्यात मात्र हवामानाची वेगळीच स्थिती आहे. आज शनिवारी छत्रपती संभाजीनगर आणि जालना वगळता सहा जिल्ह्यांत जोरदार पावसाची शक्यता आहे. हवामान विभागाने आज बीड, धाराशिव, लातूर, नांदेड, हिंगोली आणि परभणी या जिल्ह्यांमध्ये पुढील 24 तासांसाठी यलो अलर्ट जारी केला आहे. त्यामुळे नागरिकांना योग्य ती काळजी घ्यावी लागेल.

मराठवाड्यातील सहा जिल्ह्यांत आज ताशी 30 ते 40 किमी वेगाने वारे वाहून विजांसह जोरदार पावसाचा अंदाज आहे. रविवारपासून हवामानात पुन्हा मोठे बदल जाणवणार असून पावसाचा जोर ओसरणार आहे. पुढील काही काळ पावसाचा कोणताही अलर्ट हवामान विभागाकडून देण्यात आलेला नाही.

छत्रपती संभाजीनगर आणि जालना जिल्ह्यात ऑक्टोबरच्या सुरुवातीपासूनच पावसाने उघडीप घेतली आहे. आज 4 सप्टेंबर रोजी या दोन्ही जिल्ह्यांना सतर्कतेचा कोणताही इशारा देण्यात आलेला नाही. तसेच पुढील काही दिवस मुसळधार पावसाचा अंदाज नाही. मात्र, आज काही ठिकाणी तुरळक हलक्या ते मध्यम पावसाची शक्यता आहे.

दरम्यान, सकाळी हवेत काहीसा गारवा जाणवत असून दुपारी अंशत: ढगाळ हवामानासह पाऊस होत आहे. त्यामुळे मराठवाड्याला विचित्र हवामान स्थितीचा सामना करावा लागत आहे. दिवाळीपर्यंत थंडीची तीव्रता वाढण्याची शक्यता असून हवामानात मोठ्या बदलांचा अंदाज हवामान विभागाने वर्तवला आहे.