Monsoon आधी अवकाळी पावसाचं धुमशान, मराठावाड्यासाठी पुढचे 24 तास महत्त्वाचे, IMD कडून अलर्ट

गेल्या काही दिवसांत मराठवाड्यावर आस्मानी संकट घोंघावत आहे. आज देखील वादळी वाऱ्यांसह अवकाळी पावसाचे सावट कायम आहे. पुढील 24 तासांसाठी छत्रपती संभाजीनगरसह बीड, लातूर आणि धाराशिव या जिल्ह्यांना पावसाचा यलो अलर्ट देण्यात आला आहे.

मराठवाड्यातील काही भागात मंगळवारी वादळी पावसाने हजेरी लावली. छत्रपती संभाजीनगरमध्ये देखील जोरदार पाऊस झाला. काही भागात या वादळी पावसाने शेतकऱ्यांचे मोठे नुकसान झाले आहे. अशातच आज पुन्हा पावसाची शक्यता वर्तवण्यात आली असून सकाळपासूनच ढगाळ वातावरण आहे. आज 30 ते 40 किमी प्रतितास या वेगाने वारे वाहतील.

बीड, धाराशिव आणि लातूर या जिल्ह्यांना देखील आज यलो अलर्ट देण्यात आला आहे. या काळात ताशी 40 ते 50 किमी वेगाने वारे वाहतील. तसेच विजांच्या कडकडाटासह वादळी पाऊस होण्याची शक्यता आहे. या जिल्ह्यांत पुढील 3 दिवस अशीच स्थिती राहणार असल्याचा अंदाज हवामान विभागाने वर्तवला आहे.

मराठवाड्यातील जालना, परभणी, हिंगोली आणि नांदेड या जिल्ह्यांत देखील हवामान काहीसं ढगाळ राहील. या जिल्ह्यांना कोणताही अलर्ट नसला तरी तुरळक पावसाची शक्यता हवामान विभागाने वर्तवली आहे. पुढील 2 दिवस हवामानाची हिच स्थिती राहणार असून त्यानंतर मात्र हवामान कोरडे राहील.

दरम्यान, गेल्या काही दिवसांत मराठवाड्यात वादळी पावसाने हजेरी लावली. तर काही ठिकाणी गारपिटीने झोडपले. त्यामुळे शेतीपिकांचे मोठे नुकसान झाले असून शेतकऱ्यांवर संकट कोसळले आहे. पुढील काही दिवस हवामानाची हिच स्थिती राहणार असल्याने शेतकऱ्यांना योग्य ती काळजी घ्यावी लागेल.