मंगळसूत्र-पाटल्या आताच खरेदी करून घ्या! दिवाळीपर्यंत आणखी महाग होणार सोनं, आजचे दर काय?

नितीन नांदुरकर, प्रतिनिधी जळगाव: जागतिक पातळीवर सोन्याच्या मागणीत मोठी वाढ झाल्याचा परिणाम म्हणून सोन्याच्या दरात मोठी वाढ होत असल्याचे दिसून येत आहे. गेल्या दोन दिवसांतच सोन्याच्या दरात तब्बल 2500 रुपयांची वाढ झाली असून, जीएसटीसह सोन्याचा दर 1,24,650 रुपयांच्या टप्प्यावर पोहोचला आहे.

आगामी काळातही सोन्याच्या दरात आणखी वाढ होण्याची शक्यता व्यक्त केली जात आहे. जागतिक बाजारपेठेत रशिया-युक्रेन युद्ध, अमेरिकन फेडरल बँकांचे कमी झालेले व्याजदर, रुपयाची डॉलरच्या तुलनेत झालेली घसरण आणि अमेरिकेत सुरू असलेले "शटडाउन" या सर्व घटकांचा एकत्रित परिणाम म्हणून अनेक देशांनी मोठ्या प्रमाणावर सोने खरेदी सुरू केली आहे.

यामुळे जागतिक बाजारपेठेत सोन्याची मागणी वाढली असून, दरात झपाट्याने वाढ होत असल्याचे सुवर्ण व्यावसायिकांनी सांगितले. ७ ऑक्टोबरला सोन्याच्या बाजारात पुन्हा तेजी परतली आहे. सलग तीन दिवस चाललेली घसरण अखेर थांबली असून, काल संध्याकाळीच सोन्याचा भाव नव्या उच्चांकावर पोहोचला होता. ही तेजी आज सकाळपर्यंत कायम आहे.

राजधानी दिल्लीमध्ये २४ कॅरेट सोन्याचा दर वाढून प्रति १० ग्रॅम १,२०,७४० रुपयांवर गेला आहे. २२ कॅरेट सोनं देखील महागलं आहे. मुंबई, चेन्नई आणि कोलकाता येथे सध्या २२ कॅरेट सोन्याचा दर प्रति १० ग्रॅम १,१०,७१० रुपये आहे, तर २४ कॅरेट सोनं प्रति १० ग्रॅम १,२०,७८० रुपयांवर विकले जात आहे.

इंडियन बुलियन असोसिएशनच्या मते, 24 कॅरेट सोन्यासाठी 1 लाख 23 हजार 881 रुपये प्रति तोळा मोजावे लागणार आहेत. 22 कॅरेटसाठी 1 लाख 13 हजार ५४५ रुपये मोजावे लागणार आहेत. 18 कॅरेट सोन्यासाठी 92 हजार 909 रुपये प्रति तोळा मोजावे लागणार आहेत. 14 कॅरेटसाठी 72 हजार 262 रुपये प्रति तोळा मोजावे लागणार आहेत.

999 शुद्घ चांदीसाठी 1 लाख 54 हजार 775 रुपये दर मोजावे लागणार आहेत. तर GST सह 1 लाख 50 हजार 668 रुपये मोजावे लागणार आहेत. चांदीचे दर दिवाळीपर्यंत 1 लाख 60 हजार रुपयांचा टप्पा ओलांडणार असल्याचं सांगितलं जात आहे.