पश्चिम महाराष्ट्रात आजही पावसाची शक्यता, 'या' जिल्ह्यात विश्रांती नाहीच! 

राज्यातील काही जिल्ह्यात पावसाने विश्रांती घेतली असली तरी काही ठिकाणी पावसाची रिपरिपसुरूच आहे. तर पश्चिम महाराष्ट्रातील काही भागात आज मध्यम स्वरूपाच्या पावसाची शक्यता आहे.

पुणे जिल्ह्यात पुढील काही दिवस आकाश अंशतः ढगाळ राहून तुरळक ठिकाणी हलक्या ते मध्यम स्वरूपाचा पाऊस पडण्याची शक्यता आहे. घाटमाथ्यावर मध्यम स्वरूपाचा पाऊस कोसळेल असा अंदाज हवामान विभागाने वर्तवला आहे. पुण्यात आज 26 अंश सेल्सीअस कमाल तर 20 अंश सेल्सीअस किमान तापमान असेल.

सातारा जिल्ह्यात पुढील काही दिवस मध्यम स्वरूपाच्या पावसाची शक्यता हवामान विभागाने वर्तवली आहे. सातारा जिल्ह्यातील वाई, खंडाळा, कोरेगाव, फलटण, माण, खटाव, कराड, पाटण, जावळी, महाबळेश्वर या ठिकाणी मध्यम स्वरूपाच्या पावसाची शक्यता हवामान विभागाणे वर्तवली आहे. साताऱ्यात आज 26 अंश सेल्सीअस कमाल तर 19 अंश सेल्सीअस किमान तापमान असेल.

कोल्हापूर जिल्ह्यांमध्ये आज आणि उद्या मेघ गर्जना व विजांचा कडकडासहित तुरळक ठिकाणी हलक्या ते मध्यम स्वरूपाचा पाऊस पडण्याची शक्यता आहे. कोल्हापूर मध्ये 27 अंश सेल्सीअस कमाल तर 21 अंश सेल्सीअस किमान तापमान असेल.

सांगली जिल्ह्यातील तासगाव, मिरज, कडेगाव तालुक्यात जोरदार पावसाचा इशारा देण्यात आलाय. तर वाळवा, पलूस, मिरज तालुक्यात भागात पावसाची संततधार होईल. सांगलीत आज 25 अंश सेल्सीअस कमाल तर 21 अंश सेल्सीअस किमान तापमान असेल.

सोलापूर जिल्हा मुळात रब्बी हंगामाचा आहे. सध्या उत्तरा नक्षत्राच्या पावसाचा जोर कायम असेल असा अंदाज हवामान विभागाने वर्तवला आहे.आज सोलापूर जिल्ह्यातील अक्कलकोट, मंगळवेढा, पंढरपूर या ठिकाणी जोरदार पाऊस कोसळेल. सोलापूर मध्ये आज 27 अंश सेल्सीअस कमाल तर 22 अंश सेल्सीअस किमान तापमान असेल.

पश्चिम महाराष्ट्रातील काही जिल्ह्यात अजूनही पुढील काही दिवस पावसाची जोरदार बॅटिंग होणार असल्याची शक्यता वर्तवण्यात येत आहे.