काय सांगता...गायीने एकावेळी दिला 3 वासरांना जन्म, सर्व वासरं ठणठणीत!

जेव्हा गाय वासराला जन्म देते, तेव्हा तिचा गोठा आणि ते संपूर्ण घर दूध, दुग्धजन्य पदार्थांनी संपन्न होतं. सर्वत्र आनंद साजरा केला जातो.

एका ठिकाणी तर गायीने एकत्र चक्क तीन वासरांना जन्म दिला. याबाबत सर्वत्र आश्चर्य व्यक्त केलं जात असून हा निसर्गाचा चमत्कार मानला जातोय.

साताऱ्यातील वाघोली गावचे रहिवासी राजेश जाधव यांच्या गायीला गोठ्यात तीळं झालं. ही माहिती पाहता पाहता सर्वत्र वाऱ्यासारखी पसरली. लहान मुलांपासून वृद्ध व्यक्तींपर्यंत सर्वांनी गाय आणि तिची वासरं पाहायला राजेश यांच्या गोठ्यात गर्दी केली. हजारो गायींमागून एखादी गाय एकाच वेळी तीन वासरांना जन्म देते, असं म्हटलं जातं.

गायीच्या गर्भाशयात तीन स्त्री बीज आणि कृत्रिम रेतन पद्धतीने सोडलेल्या वीर्यातील 3 शुक्राणूंमुळे 3 वासरांचा जन्म होऊ शकतो. पशुवैद्यकीय क्षेत्रात 24 वर्ष कामाचा अनुभव असलेले वाघोलीतील डॉक्टर रतन भोईटे यांनी याबाबत माहिती दिली.

कृत्रिम रेतन ही पाळीव प्राण्यांच्या कृत्रिम गर्भधारणेसाठी वापरण्यात येणारी एक पद्धत आहे. या पद्धतीत वळूचे अथवा रेड्याचे (नर पशू) वीर्य (रेतन) संकलन करून ते योग्य प्रक्रिया करून साठवलं जातं. नंतर गाय, म्हैस, अशा दुधाळू जनावरांचं 'फलन' त्याद्वारे करण्यात येतं.