Goa Accident : गोव्याहून परत येताना भीषण अपघात, घाटातून कार 100 फूट खाली कोसळली

गोव्यात पर्यटनासाठी आलेल्या कर्नाटकमधील पर्यटकांच्या खासगी कारचा तिलारी घाटात मोठा अपघात झाला. या अपघातात कारमधील सर्वजण गंभीर जखमी असून त्यांना उपचारासाठी बेळगावला नेण्यात आलं आहे.

गोव्याहून तिलारी घाटमार्गे बेळगाव कर्नाटकला जात असताना कार (के ए 02 एम एन 2906) तिलारी घाटात पोहोचली, तेव्हा एका वळणदार रस्त्यावर चालकाचं कारवरील नियंत्रण सुटलं आणि कार समोरच्या दगडाला आदळली.

ही कार दगडाला आदळल्यानंतर तिथून पुन्हा मागच्या रस्त्यावर जवळपास 100 ते 120 फूट खाली कोसळली. यात कारचेही मोठे नुकसान झालं आहे, तसंच कारमधील सगळेजण गंभीर जखमी झाले.

अपघातानंतर घाट रस्त्यातून जात असणाऱ्या इतर प्रवाशांनी जखमींना मदत करून उपचारासाठी बेळगावच्या रुग्णालयात नेलं. अपघातस्थळी रस्त्यावर मोठा रक्तस्राव झाला आहे, तसंच कारचाही चक्काचूर झाला आहे.