Weather Update : बळीराजासाठी आनंदाची बातमी! राज्यात पाऊस पुन्हा सक्रीय होणार, या ठिकाणी ऑरेंज अलर्ट

गेल्या दीड महिन्यापासून पावसाने दडी मारल्याने राज्यात बळीराजा चिंतेत आहे. मात्र आता पाऊस पुन्हा सक्रीय होणार असल्याचा अंदाज हवामान विभागाने वर्तवला आहे.

बंगालच्या उपसागरात कमी दाबाचे क्षेत्र तयार झाले आहे. ते पश्चिम आणि उत्तर-पश्चिमेकडे सरकण्याची चिन्हे आहेत.

कमी दाबाच्या क्षेत्रामुळे कोकण-गोव्यासह मध्य महाराष्ट्र, मराठवाडा आणि विदर्भात मॉन्सून पुन्हा सक्रिय होण्याची शक्यता आहे

विदर्भ, मराठवाड्यात आजपासून तर राज्यात येत्या दोन दिवसात बहुतांश ठिकाणी पावसाची शक्यता आहे. याशिवाय कोकण किनारपट्टीलगत आजपासून पावसाचा जोर वाढणार आहे.

कोकणात तुरळक ठिकाणी मुसळधार पावसाची शक्यता असून पुण्यासह नाशिक, सातारा जिल्ह्यातील घाट भागात तुरळक ठिकाणी मुसळधार पावसाचा अंदाज हवामान विभागाने व्यक्त केला आहे.

भंडारा, गडचिरोली, नागपूर, वर्धा जिल्ह्यात आज ‘ऑरेंज अलर्ट’ दिला आहे. तर कमी दाबाचे क्षेत्र विदर्भाकडून मराठवाड्याकडे सरकरण्याची चिन्हे आहेत. त्यामुळे मराठवाड्यातही दोन दिवस पावसाचा जोर वाढेल, असं हवामान विभागाने म्हटलंय.