रेल्वेनं प्रवास करणाऱ्यांसाठी मोठी बातमी! १ डिसेंबरपासून बदलणार तिकीट बुकिंगचा नियम

तुम्ही रेल्वेनं प्रवास करत असाल किंवा करायच्या विचारात असाल तर तुमच्यासाठी ही बातमी महत्त्वाची आहे. पश्चिम रेल्वेनं तिकीट बुकिंगच्या नियमात बदल केला असून हे नियम 1 डिसेंबरपासून कठोरपणे लागू केले जाणार आहेत. या नियमात कोणताही बदल होणार नाही. रेल्वेने तात्काळ तिकीट बुकिंग करणाऱ्या प्रवाशांना मोठा दिलासा दिला आहे.

रेल्वे बोर्डाने जारी केलेल्या निवेदनानुसार पश्चिम रेल्वेने आता तिकीट बुकिंगच्या सिस्टिममध्ये एक अत्यंत महत्त्वाचा बदल करण्याचा निर्णय घेतला आहे. हा बदल विशेषतः मुंबई सेंट्रल-अहमदाबाद शताब्दी एक्स्प्रेसच्या प्रवाशांसाठी खूप महत्त्वाचा आहे, कारण यामुळे खऱ्या आणि गरजू प्रवाशांना तिकीट मिळणे अधिक सोपं आणि सोईचं होणार आहे.

या नव्या नियमानुसार, आता शताब्दी एक्स्प्रेसचे तात्काळ तिकीट बुक करताना प्रवाशांना वन टाईम पासवर्ड देणं आवश्यक असणार आहे. तुमचं आधार कार्डशी लिंक असलेल्या नंबरवरच हा OTP येईल. तिकीट प्रणाली आपोआप एक पासवर्ड तयार करेल आणि तो ओटीपी प्रवाशाने बुकिंगच्या वेळी दिलेल्या मोबाईल क्रमांकावर पाठवला जाईल. हा ओटीपी यशस्वीरित्या प्रमाणित झाल्यानंतरच प्रवाशाला तिकीट जारी केले जाईल.

पश्चिम रेल्वेचे मुख्य जनसंपर्क अधिकारी श्री विनीत अभिषेक यांनी दिलेल्या माहितीनुसार, ओटीपी-आधारित प्रमाणीकरणाची ही नवीन प्रणाली ०१ डिसेंबर २०२५ पासून, पहाटे ००:०० वाजल्यापासून लागू होणार आहे. सुरुवातीला हा नियम ट्रेन क्र. १२००९/१२०१० मुंबई सेंट्रल-अहमदाबाद शताब्दी एक्स्प्रेस या गाडीसाठी लागू होईल. यामुळे तात्काळ तिकिटांचा गैरवापर आणि कृत्रिम बुकिंग करणाऱ्यांवर नियंत्रण येईल अशी आशा व्यक्त केली आहे.

ही नवीन ओटीपी सिस्टीम केवळ ऑनलाईन बुकिंगसाठी नाही, तर तात्काळ तिकीट बुकिंगच्या सर्व माध्यमांसाठी लागू असेल. यामध्ये कॉम्प्युटराइज्ड तिकीट काउंटर, रेल्वेचे अधिकृत एजंट, तसेच आयआरसीटीसीची अधिकृत वेबसाइट आणि मोबाईल ॲपद्वारे केलेल्या बुकिंगचा समावेश आहे. या बदलाचा उद्देश तात्काळ बुकिंग प्रक्रियेत पूर्ण पारदर्शकता आणणे आणि खऱ्या प्रवाशांना तिकीट सहज उपलब्ध करून देणे हाच आहे.

ओटीपी पडताळणीची ही प्रक्रिया सुरळीत पार पडावी यासाठी प्रवाशांना एक अत्यंत महत्त्वाचा सल्ला देण्यात आला आहे. तिकीट बुकिंग करताना प्रवाशांनी वैध आणि उपलब्ध असलेला मोबाईल क्रमांक देणे बंधनकारक आहे. त्यामुळे आता तिकीट बुक करताना घाईघाईत चुकीचा क्रमांक देणे टाळावे लागेल. पश्चिम रेल्वेने सर्व प्रवाशांना या महत्त्वपूर्ण बदलाची नोंद घेऊन सहकार्य करण्याचे कळकळीचे आवाहन केले आहे.