SBI ने कोट्यवधी ग्राहकांना केलं सावध! अजिबात करु नका या चुका

देशातील सर्वात मोठी सरकारी बँक भारतीय स्टेट बँकेने लोकांना डीपफेक स्कॅमविषयी सावध राहण्याचा सल्ला दिला आहे. एसबीआयने इशारा दिला आहे की, सायबर स्कॅमर्स आता आर्टिफिशियल इंटेलिजेन्स (AI) च्या मदतीने बनावट व्हिडिओ, आवाज आणि फोटो तयार करुन लोकांना फसवत आहेत.

बँकेने त्यांच्या अधिकृत ट्विटर हँडलवर एक पोस्ट शेअर केली आहे, ज्यामध्ये असे म्हटले आहे की जर कोणी अचानक पैसे पाठवण्याची घाई दाखवली तर त्याच्यावर विश्वास ठेवू नका.

SBI ने स्पष्ट केले की फसवणूक करणारे तुमच्यावर विश्वास असलेल्या एखाद्या व्यक्तीची, जसे की कुटुंबातील सदस्य, मित्र, ऑफिस वरिष्ठ किंवा बँक अधिकारी असल्याचे भासवतात. नंतर ते भावनिक दबावाचा वापर करतात किंवा पैसे काढण्यासाठी आपत्कालीन परिस्थितीत असल्याचे भासवतात.

डीपफेक स्कॅममध्ये, सायबर गुन्हेगार एआय तंत्रज्ञानाचा वापर करून एखाद्या व्यक्तीचा व्हिडिओ किंवा व्हॉइस इम्पर्सनेशन तयार करतात. या इमेज इतक्या खऱ्या दिसतात की सामान्य लोकांची सहज फसवणूक होते. बऱ्याच प्रकरणांमध्ये, लोक व्हिडिओ कॉलवरील व्यक्ती तीच व्यक्ती आहे असे गृहीत धरतात आणि व्हेरिफिकेशन न करता पैसे ट्रान्सफर करतात.

SBI नुसार, एखाद्या व्यक्तीने अचानक पैसे हवे आहेत असं सांगितलं, पैसे पाठवण्यासाठी तुमच्यावर व्हिडिओ कॉल करुन दबाव आणला तर त्यांच्यावर विश्वास ठेवू नका. बँकेने म्हटले की, पैसे पाठवण्यापूर्वी ऑफिशियल चॅनलकडून कंफर्म करा.

कोणत्याही सायबर फसवणुकीच्या बाबतीत, ताबडतोब 1930 हेल्पलाइन नंबरवर कॉल करा किंवा cybercrime.gov.in वर तक्रार दाखल करा, असा सल्ला एसबीआयने दिला आहे.

SBIचा अलर्ट जनतेसाठी महत्त्वाचे धडे देतो: घाईघाईने पैसे पाठवू नका, व्हिडिओ कॉलवर आंधळेपणाने विश्वास ठेवू नका, उलटतपासणी करा, पडताळणीशिवाय अज्ञात लिंक्स किंवा अकाउंटवर पैसे पाठवू नका आणि गप्प राहण्याऐवजी फसवणुकीची तक्रार करा.

डिजिटल पेमेंट आणि AI तंत्रज्ञानाच्या वाढत्या वापरामुळे, सायबर गुन्ह्यांच्या पद्धती वेगाने विकसित होत आहेत. पूर्वी फसवणूक फक्त कॉल आणि मेसेजपुरती मर्यादित असायची, परंतु आता बनावट व्हिडिओ आणि आवाजांनी लोकांना लक्ष्य केले जात आहे. थोडीशी दक्षता तुम्हाला मोठ्या आर्थिक नुकसानापासून वाचवू शकते.