अचानक सगळीकडे हिरव्या रंगाचा वायू पसरला, एकाने जागेवर जीव सोडला, मुंबईजवळील भयानक घटना PHOTOS

मुंबई जवळील वसई इथं एक भयानक घटना घडली आहे. वसई विरार महापालिकेच्या पाण्याच्या टाकीवर शुद्धीकरणासाठी वापरण्यात येणाऱ्या सिलेंडरचा गॅस लिक झाला. या अपघातात १ जणाचा मृत्यू झाला आहे. तर ६ जण जखमी झाले आहे. जखमींना तातडीने शासकीय रुग्णालयात उपचारासाठी दाखल केलं आहे.

वसई पश्चिमेकडील माणिकपुर पोलीस स्टेशन हद्दीत वसई पश्चिम येथील दीवाणमान स्मशानभूमीजवळील वसई-विरार महानगरपालिकेच्या पाणी टाकीवर आज (मंगळवार) सायंकाळी अंदाजे ५ वाजेच्या सुमारास मोठा अपघात घडला. पाणी शुद्धीकरणासाठी वापरल्या जाणाऱ्या क्लोरिन सिलेंडरला अचानक गळती सुरू झाली. या रासायनिक वायुचा गंभीर परिणाम आसपास असलेल्या १० ते १५ लोकांवर झाला.

या अपघातात गंभीर जखमी झालेल्या देव पारडीवाला यांचा रुग्णालयात नेताना मृत्यू झाला, अशी माहिती समोर आली आहे. तर ६ जणांना डिवाइन हॉस्पिटल आणि वसई गावातील मनपाच्या सर डी.एम. पेटीट रुग्णालयात दाखल करण्यात आलं आहे.

क्लोरिनची गळती झाल्याची माहिती मिळताच अग्निशमन दल, पोलीस आणि स्थानिक प्रशासन घटनास्थळी दाखल झाले. परिसर रिकामा करण्यात आला असून पुढील धोक्यांची तपासणी सुरू आहे.

दरम्यान, या घटनेबाबत मनपा प्रशासन आणि आरोग्य विभाग कोणतीही अधिकृत माहिती देण्यास टाळाटाळ करत असल्याने नागरिकांमध्ये तीव्र नाराजी पसरली आहे.

स्थानिक नागरिकांनी हा प्रकार मनपाच्या निष्काळजीपणाचा परिणाम असल्याचा आरोप केला आहे आणि त्वरित पारदर्शक चौकशी करण्याची मागणी केली आहे.

पाणी टाकीजवळील परिसर काही वेळासाठी बंद ठेवण्यात आला असून परिस्थिती नियंत्रणात आणण्याचे प्रयत्न सुरू आहेत.

अग्निशमन दलाच्या जवानांनी लिक झालेले सिलेंडर हे घटनास्थळावरून दूर नेऊ निकामी केले आहे.