Mumbai Weather: पुढील 24 तास महत्त्वाचे, कोकणात पाऊस कोसळणार, हवामान विभागाचा अलर्ट

गेल्या काही दिवसांपासून कोकण किनारपट्टीसह मुंबई, ठाणे, नवी मुंबई आणि पालघर परिसरात हलक्या ते मध्यम स्वरूपाचा पाऊस सुरू आहे. सध्या पावसाच्या सरींनी नागरिकांना थोडा आराम दिला आहे. पण हवामान विभागाच्या अंदाजानुसार, आज कोकणासह शहरी भागांत दिवसभर ढगाळ वातावरण राहील आणि ठिकठिकाणी रिमझिम ते मध्यम स्वरूपाचा पाऊस पडेल.

मुंबईत आज सकाळपासून ढगाळ वातावरण राहणार आहे. दुपारनंतर हलक्या ते मध्यम स्वरूपाच्या सरी बरसतील . हवामान विभागाने दिलेल्या माहितीनुसार आज कमाल तापमान सुमारे 30°C, तर किमान तापमान 27°C पर्यंत राहील. आर्द्रतेचे प्रमाण जास्त असल्याने उकाडा जाणवेल, विशेषतः पावसाच्या सरींच्या दरम्यान दमट वातावरण जाणवण्याची शक्यता आहे.

ठाणे व नवी मुंबई परिसरात आज दिवसभर रिमझिम पाऊस पडणार असून, काही ठिकाणी पावसाची तीव्रता वाढण्याची शक्यता आहे. हवामान विभागाने नागरिकांना वाहतुकीसाठी वेळेचे नियोजन करण्याचा सल्ला दिला आहे. कमाल तापमान 29°C आणि किमान तापमान 26°C राहील. समुद्रकिनारी व कमी उंचीच्या भागात पाणी साचण्याची शक्यता अल्प आहे, परंतु सतत सरी येत राहतील.

हवामान विभागाने दिलेल्या माहितीनुसार पालघर जिल्ह्यात आज हलक्या ते मध्यम स्वरूपाचा पाऊस सुरू राहणार आहे. सकाळी व संध्याकाळी पावसाचा जोर किंचित वाढू शकतो. कमाल तापमान 29°C, तर किमान तापमान 25°C राहील. शेतकरी बांधवांसाठी हा पाऊस पिकांसाठी फायदेशीर ठरेल, तर नागरिकांसाठी हवामान थोडं गारवा आणेल.

कोकणातील रायगड, रत्नागिरी आणि सिंधुदुर्ग जिल्ह्यांत आज दिवसभर ढगाळ वातावरण राहणार असून, रिमझिम ते मध्यम स्वरूपाचा पाऊस पडणार आहे. या भागात कमाल तापमान 29–30°C आणि किमान तापमान 25–26°C राहील. समुद्रकिनारी लाटा उंच उसळण्याची शक्यता असल्यामुळे मासेमारीसाठी जाताना आवश्यक काळजी घ्यावी असं सांगितलं आहे.