Weather Alert: पुढील 24 तास धोक्याचे, राज्यातील 11 जिल्ह्यांत वादळी पाऊस कोसळणार, हवामान विभागाचा अलर्ट

जोरदार पावसानंतर आता राज्यातील काही भागांत पावसाने उघडीप दिली आहे. गेल्या दोन दिवसांत राज्यातील विविध भागांत पावसाचा जोर कमी झालेला दिसून येत आहे.

तरीही 23 ऑगस्ट रोजी कोकण, मध्य महाराष्ट्र आणि मराठवाड्यात हलक्या ते मध्यम स्वरूपाच्या पावसाची शक्यता वर्तवण्यात आली आहे, तर विदर्भात वादळी वाऱ्यासह पावसाची शक्यता हवामान विभागानं वर्तवली आहे. पाहुयात, 23 ऑगस्ट रोजी राज्यातील हवामानाची स्थिती कशी राहील.

मुंबई आणि उपनगरात मध्यम स्वरूपाच्या पावसाची शक्यता आहे, तर मुंबईसह पालघर, ठाणे, रायगड, रत्नागिरी, सिंधुदुर्ग या सर्वच जिल्ह्यांत मध्यम पावसाची शक्यता वर्तवण्यात आली आहे. गेल्या काही दिवसांच्या तुलनेत कोकण विभागातील पावसाचा जोर ओसरला आहे.

पश्चिम महाराष्ट्रातील पुणे, कोल्हापूर, सातारा, सांगली, सोलापूर या जिल्ह्यांत हलक्या पावसाची शक्यता वर्तवण्यात आली आहे, तर पश्चिम महाराष्ट्रातील घाटमाथा परिसरात मध्यम स्वरूपाच्या पावसाची शक्यता असल्याचं हवामान विभागाकडून सांगण्यात आलं आहे.

मराठवाड्यातील छत्रपती संभाजीनगर, जालना, परभणी, बीड, हिंगोली, नांदेड, लातूर, धाराशिव या जिल्ह्यांत ढगांच्या गडगडाटासह हलक्या पावसाची शक्यता वर्तवण्यात आली आहे. या जिल्ह्यांना पावसाचा कोणताही अलर्ट जारी करण्यात आलेला नाही.

विदर्भातील नागपूर, अकोला, अमरावती, भंडारा, बुलढाणा, चंद्रपूर, गडचिरोली, गोंदिया, वर्धा, वाशिम आणि यवतमाळ या जिल्ह्यांत विजांच्या कडकडाटासह आणि वादळी वाऱ्यासह पावसाची शक्यता वर्तवण्यात आली आहे.

विदर्भातील सर्वच जिल्ह्यांना पावसाचा यलो अलर्ट जारी करण्यात आला आहे. राज्यातील बहुतांश भागांमध्ये पावसाचा जोर सध्या कमी झाला असला तरी काही ठिकाणी अजूनही हलक्या ते मध्यम स्वरूपाचा पाऊस होण्याची शक्यता आहे. कोकण, मध्य महाराष्ट्र आणि मराठवाड्यात हलक्या ते मध्यम पावसाचा अंदाज वर्तवण्यात आला आहे, तर विदर्भात विजांसह वादळी पावसाचा इशारा दिला आहे. त्यामुळे नागरिकांनी योग्य ती काळजी घेण्याचे आवाहन करण्यात आले आहे.