एमबीए शिकलेल्या तरुणाने पुण्यात सुरू केला कोल्हापुरी भडंग, अल्पावधीतच जिंकले खवय्यांचे मन

पुणे शहर आपल्या खाद्यसंस्कृतीसाठी प्रसिद्ध आहे. मिसळ, पाणीपुरी, वडापाव, भेळ अशा असंख्य पदार्थांच्या एक वेगळी चव असून त्यामध्ये विविधता पाहिला मिळते. सदाशिव पेठ परिसरात सुरू झालेल्या भडंग खाण्यासाठी नागरिकांची मोठी गर्दी होत असते.

विशेष म्हणजे ही भेळ विकणारा तरुण म्हणजे एमबीए पदवीधर श्रीनाथ शिंदे, ज्याने आपले शिक्षण पूर्ण केल्यानंतर नोकरीच्या ऐवजी स्वतःचा व्यवसाय सुरू करण्याचा निर्णय घेतला.

मूळचा कोल्हापूरचा असलेला श्रीनाथ शिंदे पुण्यात एमबीएचे शिक्षण घेण्यासाठी आला होता. शिक्षण घेत असतानाच त्याने पाहिले की पुण्यात कोल्हापुरी पद्धतीची भडंग भेळ कुठेही मिळत नाही.

बालपणापासूनच व्यवसायाची आवड असलेल्या श्रीनाथने हीच संधी ओळखली आणि कोल्हापुरी चाट हाऊस या नावाने स्वतःचा खाद्य व्यवसाय सुरू केला. त्याच्या या उपक्रमाला अल्पावधीतच प्रचंड प्रतिसाद मिळू लागला आहे.

श्रीनाथ सांगतो, कोल्हापुरी भडंग ही साध्या मुरमुर्‍यांपेक्षा वेगळी असते. ती ज्वारीपासून बनवली जाते आणि तिच्यात मसाल्याचा झणझणीत तडका असतो. लोकांना ती खास कोल्हापुरी चव अनुभवायला मिळावी म्हणून सर्व साहित्य मी थेट कोल्हापूरहून मागवतो. या भडंग भेळीचे सात प्रकार उपलब्ध आहेत.

कोल्हापुरी स्पेशल भेळ, कोल्हापुरी झटका भेळ, कोल्हापुरी खरडा भेळ, सुकी भेळ, रगडा भेळ, फरसाण भेळ, आणि मका भेळ. प्रत्येक प्रकारात कोल्हापुरी मसाल्याची खासियत दिसते. शेव, पापडी, फरसाण आणि भडंग या सगळ्या गोष्टी कोल्हापूरहून आणल्या जातात, ज्यामुळे त्या भेळीला अस्सल चव मिळते. या व्यवसायातून श्रीनाथला महिन्याला सरासरी एक लाख रुपयांपर्यंत उत्पन्न मिळत आहे. पुणेकरांसोबतच बाहेरून आलेले विद्यार्थी आणि पर्यटकही या भेळीच्या ठिकाणी गर्दी करत आहेत.

श्रीनाथ म्हणतो, लोकांना चव आणि दर्जा दोन्ही मिळाला की ते पुन्हा येतात. माझा उद्देश केवळ नफा नव्हे, तर कोल्हापुरी खाद्यसंस्कृतीचा वारसा पुण्यात पोहोचवणे हा आहे. एमबीए करून नोकरीचा मार्ग निवडण्याऐवजी व्यवसायात उतरलेल्या श्रीनाथ शिंदेने अनेक तरुणांसाठी प्रेरणादायी उदाहरण निर्माण केले आहे. त्याच्या कोल्हापुरी भडंग भेळ व्यवसायाची पारंपरिक चव, उद्योजकतेचा आत्मविश्वास आणि आधुनिक विचारसरणी या तिन्हींचा सुंदर संगम अनुभवायला मिळतो.