Pune News: ‘गुडलक’ कॅफेचं पुन्हा बॅड लक! आधी मस्कामध्ये काच, आता अंडाभुर्जीत सापडलं झुरळ, ग्राहकांचा संताप!

पुण्यातील फर्ग्युसन रस्त्यावरील गुडलक कॅफेमध्ये काही दिवसांपूर्वी बन मस्कामध्ये काच सापडली होती. हे प्रकरण संपत नाही, तोच पुन्हा एकदा गुडलक कॅफे चर्चेत आलं आहे. यावेळी मुंबई-पुणे हायवेवरील फूड प्लाझामध्ये असणाऱ्या गुडलक कॅफेच्या अंडाभुर्जीत झुरळ सापडल्याची धक्कादायक घटना घडली आहे. या प्रकारामुळे ग्राहकांमध्ये संतापाचं वातावरण आहे. तर कॅफेच्या स्वच्छतेबाबत मोठं प्रश्नचिन्ह निर्माण झालंय.

अंडाभुर्जीत झुरळ सापडल्यानंतर स्थानिक ग्राहकांनी संबंधित कॅफेविरोधात आवाज उठवत अन्न व औषध प्रशासनाने याची गंभीर दखल घ्यावी, अशी मागणी केली आहे. विशेष म्हणजे, फर्ग्युसन रस्त्यावरील मुख्य शाखेमध्ये काही दिवसांपूर्वीच अन्नात काच सापडल्याचा प्रकार घडला होता. त्यानंतर अन्न व औषध प्रशासनाने तातडीने कारवाई करत संबंधित शाखेचा परवाना तात्पुरता रद्द केला होता. त्यामुळे हा कॅफे बंद आहे.

अन्न व औषध प्रशासनाने कॅफेमधील अन्न बनवण्याच्या पद्धती, स्वच्छतेच्या अटी, तसेच स्वयंपाकघराची पाहणी करताना अनेक त्रुटी निदर्शनास आणून दिल्या होत्या. या त्रुटींची पूर्तता करून सुधारणा केल्याशिवाय पुन्हा व्यवसाय सुरू करण्याची परवानगी दिली जाणार नाही, असा इशाराही प्रशासनाने दिला होता.

गुडलक कॅफेच्या मुख्य शाखेतील घटनेनंतर काही दिवसांतच आता दुसऱ्याच शाखेमध्ये म्हणजेच फूड प्लाझा परिसरात झुरळ आढळल्याने व्यवस्थापनाच्या दाव्यांवर पुन्हा एकदा शंका निर्माण झाली आहे. ग्राहकांच्या आरोग्याशी खेळ होत असल्याचं चित्र उभं राहत असून, सोशल मीडियावरही या प्रकरणाची जोरदार चर्चा सुरू झाली आहे.

अनेक ग्राहकांनी आपल्या अनुभवांविषयी पोस्ट करत कॅफेवर बहिष्कार टाकण्याचे आवाहन केले आहे. तर या घटनेबाबत गुडलक कॅफेच्या व्यवस्थापनाकडून कोणतीही अधिकृत प्रतिक्रिया मिळालेली नाही.

पुण्यातील एक नामवंत आणि जुनी ओळख असलेल्या गुडलक कॅफेच्या विश्वासार्हतेवर या सलग घडणाऱ्या घटनांमुळे मोठा धक्का बसला आहे. एकेकाळी ग्राहकांच्या पसंतीचं ठिकाण असलेल्या या कॅफेबाबत आता नागरिकांतून नाराजी व्यक्त होत आहे.

दरम्यान, गुडलक कॅफेबाबत याआधी झालेल्या प्रकारानंतर प्रशासनाने कठोर पावले उचलली होती, त्यामुळे याही वेळी योग्य ती कारवाई होण्याची शक्यता आहे. मात्र, गेल्या काही काळात ‘गुडलक’ कॅफेचं बॅड लक सुरू असल्याची चर्चा आहे.