गौरी विसर्जनाला पावसाची हजेरी, पश्चिम महाराष्ट्रातील 2 जिल्ह्यांना IMD चा अलर्ट

महाराष्ट्रात गणेश आगमनापासून कायम आहे. आतापर्यंत कधी ऊन तर कधी पाऊस असे चित्र बहुतांश ठिकाणी राहिले. आज गौरी विसर्जनाच्या दिवशी मात्र पाऊस जोरदार हजेरी लावण्याचा अंदाज आहे. पश्चिम महाराष्ट्रातील पुणे आणि सातारा या जिल्ह्यांना हवामान विभागाने यलो अलर्ट जारी केलाय.

पुणे शहरासह जिल्ह्याच्या काही भागात पावसाचा जोर कायम असणार आहे. पुण्यातील घाटमाथ्याच्या परिसरात मुसळधार पावसाची शक्यता आहे. हवामान विभागाने पुणे जिल्ह्याला पावसाचा यलो अलर्ट दिला आहे. त्यामुळे गौरी-गणपतीच्या सणात नागरिकांना समस्यांचा सामना करावा लागू शकतो. पुण्यात 28 अंश कमाल तर 21 अंश सेल्सिअस किमान तापमान राहील.

सातारा जिल्ह्यात पुढील 2 दिवस जोरदार पावसाची शक्यता आहे. हवामान विभागाने यलो अलर्ट जारी केला आहे. जिल्ह्यातील वाई, खंडाळा, कोरेगाव, फलटण, माण, खटाव, कराड, पाटण, जावळी, महाबळेश्वर या ठिकाणी मध्यम स्वरूपाच्या पावसाची शक्यता हवामान विभागाणे वर्तवली आहे. साताऱ्यात 24 अंश कमाल तर 19 अंश सेल्सिअस किमान तापमान असेल.

कोल्हापूर शहरात गुरुवारी मध्यम स्वरूपाच्या पावसाची शक्यता आहे. जिल्ह्यातील करवीर, कागल, गगनबावडा, गडहिंग्लज, चंदगड या ठिकाणी ढगांच्या गडगडाटासह पावसाचा अंदाज हवामान विभागाने वर्तवला आहे. कोल्हापूरमध्ये 27 अंश कमाल तर 21 अंश सेल्सिअस किमान तापमान असेल.

सांगली जिल्ह्यात मध्यम स्वरूपाच्या पावसाचा अंदाज आहे. येत्या आठवड्यात सांगली शहरासह परिसरात जोरदार पावसाची शक्यता आहे. सांगलीमध्ये गुरुवारी 28 अंश कमाल तर 21 अंश सेल्सिअस किमान तापमान असेल.