धो धो सुरूच! सोलापूरला पावसाचा यलो अलर्ट, पश्चिम महाराष्ट्रातील अपडेट पाहिलं का?

महाराष्ट्रातील हवामानात गेल्या काही दिवसांपासून सातत्याने बदल होत असल्याचे पाहायला मिळत आहे. हवामान विभागाने दिलेल्या अंदाजानुसार पश्चिम महाराष्ट्रातील काही जिल्ह्यात वातावरण ढगाळ राहून काही ठिकाणी तूरळक आणि मध्यम स्वरूपाच्या पावसाची शक्यता आहे.

पुणे आणि आजू बाजूच्या परिसरात आकाश ढगाळ राहणार आहे. तर अधून मधून पावसाची शक्यता आहे. पुण्यातील घाट विभागात काही तुरळक ठिकाणी हलका ते मध्यम स्वरूपाच्या पावसाची शक्यता आहे. आज पुण्यात 30 अंश सेल्सीअस कमाल तर 22 अंश सेल्सीअस किमान तापमान असेल.

सातारा जिल्ह्यातील अनेक भागात आज दुपारनंतर पावसाची शक्यता वर्तवण्यात आली आहे. पश्चिमेकडील पाटण, महाबळेश्वर, जावळी, सातारा, कऱ्हाड, वाई तालुक्यांत अनेक ठिकाणी हलक्या सरी कोसळण्याची शक्यता आहे. साताऱ्यात आज 29 अंश सेल्सीअस कमाल तर 21 अंश सेल्सीअस किमान तापमान असेल.

सांगली जिल्ह्यात पावसाची उघडझाप सुरू असून अधूनमधून मोठ्या सरी येत आहेत. मात्र पावसाचा जोर वाढण्याची शक्यता आहे. सांगली जिल्ह्यात आज 29 अंश सेल्सीअस कमाल तर 22 अंश सेल्सीअस किमान तापमान असेल.

कोल्हापूर, इचलकरंजीसह जिल्ह्याच्या अनेक भागात पाऊस हजेरी लावणार आहे. कोल्हापूरमध्ये आज 29 अंश सेल्सीअस कमाल तर 21 अंश सेल्सीअस किमान तापमान असेल.

सोलापूर शहर आणि जिल्ह्यात ढगाळ वातावरण असून काही तुरळक ठिकाणी करमाळा, पंढरपूर, मोहोळ, माढा, सांगोला आदी तालुक्यांमध्ये पावसाची शक्यता आहे. सोलापूरला आज पावसाचा यलो देण्यात आला आहे. सोलापूरमध्ये आज 30 अंश सेल्सीअस कमाल तर 22 अंश सेल्सीअस किमान तापमान असेल.