Weather Alert: पश्चिम महाराष्ट्रात तापमानाचा पारा चढाच, या जिल्ह्यांना उष्णतेचा येलो अलर्ट, पाहा आजचं हवामान

राज्यात उन्हाचा चटका कायम असून कमाल तापमानात चढ-उतार होत आहेत. पश्चिम महाराष्ट्रातील सोलापूर, सातारा आणि पुणे या तीन जिल्ह्यांना उष्ण व दमट हवामानाचा येलो अलर्ट हवामान विभागाकडून देण्यात आला आहे. उर्वरित जिल्ह्यात अंशतः निरभ्र आकाश आणि कमाल तापमानात चढ-उतार होण्याची शक्यता हवामान विभागाने वर्तवली आहे.

दिनांक 29 एप्रिल रोजी अकोला येथे राज्यतील उच्चांकी 44.5 अंश सेल्सिअस तापमानाची नोंद झाली. तर पश्चिम महाराष्ट्रातील सरासरी तापमान 21.1 ते 41.5 अंश सेल्सिअसच्या दरम्यान राहीले. पश्चिम महाराष्ट्रातील पुढील 24 तासातील हवामान अंदाज जाणून घेऊ.

मागील 24 तासात सोलापूर पश्चिम महाराष्ट्रातील सर्वाधिक उष्ण जिल्हा ठरला. सोलापुरातील कमाल तापमान 41.5 अंश सेल्सिअस तर किमान तापमान 28.2 अंश सेल्सिअस इतके होते. पुढील 24 तास सोलापुरास उष्ण व दमट हवामानाचा येलो अलर्ट हवामान विभागाने दिला आहे. यावेळी आकाश निरभ्र राहून जिल्ह्यातील कमाल तापमान 42 अंशांवर तर किमान तापमान 28 अंशांवर राहिल.

सातारा जिल्ह्यातील पारा अंशतः वाढत असून कमाल तापमान 41 अंश सेल्सिअस तर किमान तापमान 23 अंश सेल्सिअस राहण्याचा अंदाज आहे. मागील 24 तासात साताऱ्यातील पारा 40 अंशांवर राहिला होतो. तसेच भारतीय हवामान विभागाने येत्या 24 तासासाठी सातारा जिल्ह्यात उष्ण व दमट हवामानाचा येलो अलर्ट दिला आहे.

पुणे जिल्ह्यात उन्हाचा चटका कायम असून मागील 24 तासात 40.8 अंश सेल्सिअस कमाल तापमानाची नोंद झाली. तर पुढील 24 तासात पुण्यातील पारा 41 अंशांवर जाण्याचा अंदाज आहे. पुण्यातील आकाश मुख्यता निरभ्र राहील. भारतीय हवामान विभागाने पुणे जिल्ह्यासाठी उष्ण व दमट हवामानाचा येलो अलर्ट दिला आहे.

सांगली जिल्ह्यात उन्हाची होरपळ कायम आहे. तापमानात अंशता घट जाणवली. मागील 24 तासात जिल्ह्यात 37.7 कमल तापमानाची नोंद झाली. पुढील 24 तासात पारा अंशतः वाढून कमाल तापमान 39 अंश सेल्सिअस तर किमान तापमान 23 अंश सेल्सिअस राहिल. सांगली जिल्ह्यात आकाश मुख्यता निरभ्र राहणार असल्याचा अंदाज हवामान विभागाकडून वर्तवण्यात आला आहे.

कोल्हापुरातील पारा 38.3 अंशापर्यंत वाढला असून पुढील 24 तासात कोल्हापुरातील तापमानात अंशत वाढ राहील. कमाल 36 अंश सेल्सिअस तर किमान तापमान 23 अंश सेल्सिअस इतके राहील. आकाश निरभ्र राहील.