गुढीपाडव्याला सोनं मुहूर्तावर खरेदी करा, तरच होईल भरभराट! 'ही' वेळ चूकवू नका

गुढीपाडव्याच्या दिवशी स्वच्छ आंघोळ केल्यानंतर सणावाराचे कपडे परिधान करून गुढी उभारावी. गुढी उभारण्यासाठी सकाळी 6 वाजून 27 मिनिटांपासून 9 वाजून 32 मिनिटांपर्यंत शुभ मुहूर्त आहे. गुढीला नवे सुरेख वस्त्र नेसवावे, मग तिची विधीवत पूजा करावी. तिला साखरेची गाठी घालावी. पूजेनंतर गुढीसमोर नैवेद्य ठेवा. तसंच लिंबाची पानं, मिरे, हिंग आणि ओवा एकत्र करून त्याचा नैवेद्यही गुढीला दाखवा. विशेष म्हणजे हा नैवेद्य सर्वांनी खायला हवा. कारण तो आरोग्यदायी असतो. त्यामुळे विविध आजारांवर आराम मिळतो. वर्ष सुदृढ जातं. म्हणूनच गुढीला हा नैवेद्य दाखवून घरातील सर्व व्यक्तींनी खाण्याची परंपरा फार पूर्वीपासून चालत आली आहे. 

गुढीपाडव्याला सर्वजण आवर्जून सोनं खरेदी करतात. यंदा या खरेदीसाठी मुहूर्त आहे सकाळी 8 वाजून 7 मिनिटांपासून 10 वाजून 6 मिनिटांपर्यंत. ज्योतिषांनी सांगितलं की, ही स्थिर लग्नाची वेळ आहे. त्यामुळे या वेळेत खरेदी केलेलं सोनं भविष्यात कधीच विकायची किंवा कोणाला देण्याची वेळ तुमच्यावर येणार नाही. 

मुख्य म्हणजे सोनं खरेदीसाठी केवळ एकच मुहूर्त नाहीये. तर, यंदाच्या गुढीपाडव्याला तुम्ही दुपारी आणि रात्रीसुद्धा सोन्याचे दागिने खरेदी करू शकता. त्यासाठी मुहूर्त आहे दुपारी 2 वाजून 33 मिनिटांपासून 4 वाजून 42 मिनिटांपर्यंत. तर, रात्री 9 वाजून 3 मिनिटांपासून 11 वाजून 12 मिनिटांपर्यंत तुम्ही सोनं खरेदी करू शकता. 

तुम्ही जर नवं घर खरेदी केलं असेल, तर उद्याचा दिवस गृहप्रवेशासाठी अतिउत्तम आहे. तसंच या दिवशी तुम्ही इतरही शुभ काम करू शकता, असं ज्योतिषांनी सांगितलं. 

(सूचना : येथे दिलेली माहिती धार्मिक श्रद्धेवर आधारित आहे. याला कोणताही शास्त्रीय पुरावा नाही. न्यूज18 मराठी त्याची हमी देत नाही.)