दिवसरात्र AC चालू ठेवून बिल वाढतंय? या स्मार्ट टिप्स वापरा, दिवसभर वापरला तरी कमी येईल वीजबिल

एप्रिल महिना सुरू झाला की सूर्याचा कडाका वाढू लागतो. सध्या तामिळनाडूपासून महाराष्ट्रापर्यंत सगळीकडेच तापमानाचा पारा चढायला लागला आहे. कधी मध्येच पावसाच्या सरी येतात, पण त्या गेल्यानंतर होणारा उकाडा मात्र नकोसा होतो. अशा वेळी घरात पाऊल ठेवताच आपल्याला आठवण येते ती म्हणजे एसी (AC) किंवा कुलरची.

एसीच्या गारव्यात झोपणे सुखद वाटत असले तरी, महिन्याच्या शेवटी जेव्हा हातामध्ये वीज बिल येते, तेव्हा मात्र अनेकांच्या कपाळावर घाम फुटतो. कुलरच्या तुलनेत एसी जास्त वीज वापरतो हे तर नक्कीच, पण जर आपण काही स्मार्ट पद्धती वापरल्या, तर थंड हवेचा आनंद घेतानाच आपण पैशांचीही मोठी बचत करू शकतो.चला तर मग जाणून घेऊया, तुमचे वीज बिल कमी करण्याचे काही सोपे आणि प्रभावी उपाय.

16 किंवा 18 नाही, तर 24 डिग्रीवर ठेवा तापमानअनेकांना वाटते की एसी 16 किंवा 18 डिग्रीवर ठेवला तर लवकर थंडावा मिळेल. पण हे पूर्णपणे चुकीचे आहे. 'ब्युरो ऑफ एनर्जी एफिशियन्सी' (BEE) च्या मते, मानवी शरीरासाठी 24 डिग्री सेल्सिअस हे सर्वात आदर्श (Optimal) तापमान आहे. अभ्यासानुसार, एसीच्या तापमानात तुम्ही प्रत्येक 1 डिग्रीने वाढ केल्यास तब्बल 6 टक्के विजेची बचत होते. त्यामुळे विनाकारण तापमान कमी करून बिल वाढवू नका.

सर्व्हिसिंगकडे दुर्लक्ष करू नकाहिवाळ्यात किंवा पावसाळ्यात आपण एसीचा वापर बंद करतो. त्यानंतर उन्हाळ्यात तो थेट सुरू करण्यापूर्वी त्याची सर्व्हिसिंग करून घेणे अत्यंत आवश्यक आहे. जेव्हा एसी दीर्घकाळ बंद असतो, तेव्हा त्याच्या फिल्टरमध्ये धूळ आणि घाण साचते. अशा स्थितीत खोली थंड करण्यासाठी मशीनला जास्त जोर लावावा लागतो, पर्यायाने वीज जास्त वापरली जाते. वेळेवर सर्व्हिसिंग केल्यास एसीचे आयुष्यही वाढते आणि बिलही कमी येते.

'स्लीप मोड'चा (Sleep Mode) स्मार्ट वापर कराआजकल जवळजवळ प्रत्येक एसीमध्ये 'स्लीप मोड'ची सुविधा असते. रात्री झोपताना हा मोड ऑन केल्यास, एसी आपोआप खोलीतील आर्द्रता आणि तापमान नियंत्रित करतो. यामुळे आरामात झोप तर लागतेच, पण तुमची वीज जवळपास 36 टक्क्यांपर्यंत वाचू शकते.

दरवाजे आणि खिडक्यांची काळजी घ्याएसी सुरू करण्यापूर्वी हे तपासा की खोलीचे सर्व दरवाजे आणि खिडक्या व्यवस्थित बंद आहेत का. जर बाहेरची उष्ण हवा सतत आत येत असेल, तर एसीला खोली थंड करण्यासाठी अधिक वेळ काम करावे लागेल. यामुळे कॉम्प्रेसरवर ताण येतो आणि वीज बिल वाढते.

एसीसोबत पंखा कशासाठी?हे ऐकून कदाचित तुम्हाला नवल वाटेल, पण एसीसोबत छताचा पंखा वापरणे फायदेशीर ठरते. पंख्यामुळे एसीची थंड हवा खोलीच्या प्रत्येक कोपऱ्यात वेगाने पोहोचते. यामुळे तुम्हाला एसीचे तापमान खूप कमी ठेवण्याची गरज पडत नाही आणि कमी वेळात संपूर्ण खोली गार होते.

उन्हाळ्याचा सामना करताना थोडेसे नियोजन केले, तर आपण गरमीपासून स्वतःचा बचावही करू शकतो आणि आपल्या खिशाला लागणारी कात्रीही थांबवू शकतो. तर या उन्हाळ्यात आजपासूनच या टिप्स अमलात आणा.