नाकाला जीभ लावूनच दाखवली! पुण्यातील 76 वर्षांच्या आजोबांची गिनीज बुकात नोंद, VIDEO

पुणे : वय हा खरोखरच फक्त एक नंबर आहे. तुम्हाला हवे ते करण्याची आवड आणि जिद्द असेल तुम्ही ते नक्की करू शकता. याचे उत्तम उदाहरण म्हणजे भूमकर काका. पुण्यातील कसबा पेठेतील भूमकर काका यांनी 76 व्या वर्षी आपल नाव जागतिक स्तरावर नेऊन पोहोचवले आहे.

या आजोबांनी चक्क नाकाला जीभ लावण्याचा अनोखा जागतिक विक्रम केला आहे. त्यांची नोंद गिनीज बुक ऑफ वर्ल्ड रेकॉर्डमध्ये झाली आहे. याचबाबतचा हा विशेष आढावा.

कसब्यातील शिंपी आळीतील सोपान ऊर्फ काका भूमकर या आजोबांनी तब्बल एक तास 3 मिनिटे 39 सेकंद नाकाला जीभ लावून रेकॉर्ड केले आहेत. एक दिवशी त्यांनी पेपर वाचला आणि एका 13 वर्षांच्या मुलीने 51 मिनिट नाकाला जीभ लावून रेकॉर्ड केलेले वाचले आणि सहज विचार आला की, आपणही हे करू शकतो. यासाठी काही सराव न करता त्याचदिवशी त्यांनी हे 30 मिनिटे करुन पाहिले.

अगदी सहजपणे हा विक्रम केला आहे. हे सर्व करत असताना कुठलाही त्रास झाला नाही. मला पूर्वीपासूनच व्यायाम आणि कॅरम खेळाची आवड आहे. माझ्या मनात हे करण्याची इच्छाशक्ती होती, त्यामुळेच हे शक्य झाले, अशी प्रतिक्रिया सोपान भूमकर यांनी लोकल18 शी बोलताना दिली.