Ajit Pawar : पुण्यात भाजप पदाधिकाऱ्याला काळं फासण्याचा प्रयत्न; 'त्या' वक्तव्यानंतर राष्ट्रवादी आक्रमक

राष्ट्रवादी काँग्रेस अजित पवार गटाच्या कार्यकर्त्यांनी भाजप पदाधिकारी सुदर्शन चौधरी यांच्या पुणे बाजार समिती कार्यालयात आंदोलन केलं. सुदर्शन चौधरी यांनी राष्ट्रवादी महायुतेमध्ये नको अशी भूमिका घेतल्याने राष्ट्रवादीचे कार्यकर्ते आक्रमक झाले आहेत. काळं फासण्याची तयारी केली होती. पण चौधरी बाजारसमितीत बंद खोलीत बसून आहेत.

भाजप आमदार राहुल कुल यांच्यासमोरच भाजपचे पुणे जिल्हा उपाध्यक्ष आणि पुणे बाजार समितीचे संचालक सुदर्शन चौधरी यांनी शिरूर लोकसभा आढावा बैठकीमध्ये त्यांची खदखद बोलून दाखवली. अजित पवार सत्तेत असतील तर आम्हाला सत्ता नको, पुण्याचे पालकमंत्री म्हणून अजित पवार आमच्या बोकांडी बसले, अशी टीका भाजपच्या कार्यकर्त्यांनी केली आहे.

लोकसभा निवडणुकीमध्ये भाजप, एकनाथ शिंदेंची शिवसेना आणि अजित पवारांची राष्ट्रवादी काँग्रेस या महायुतीने एकत्र निवडणूक लढली. या निवडणुकीत महायुतीला फक्त 17 जागांवर यश मिळालं. यात अजित पवारांच्या राष्ट्रवादीला फक्त एक जागा जिंकता आली. शिरूर लोकसभा मतदारसंघ महायुतीत अजित पवारांच्या राष्ट्रवादीला मिळाला, यानंतर राष्ट्रवादीने शिवाजीराव आढळराव पाटील यांना उमेदवारी दिली. आढळराव पाटलांविरोधात शरद पवारांच्या राष्ट्रवादीने अमोल कोल्हेंना उमेदवारी दिली. शिरूरच्या या लढतीमध्ये अमोल कोल्हे यांनी शिवाजीराव आढळराव पाटलांचा पराभव केला.