Ajit Pawar Death : अजितदादांच्या विमानाच एक नव्हे दोन 'ब्लॅक बॉक्स' होते, तपासात ब्युरोला मोठं यश! काय समोर आलं?

विमान दुर्घटना तपास ब्युरो (AAIB) द्वारे 28 जानेवारी 2026 रोजी बारामती येथे झालेल्या लिअरजेट 45 (VT-SSK) विमान अपघाताची सखोल चौकशी सुरू आहे. ही तपासणी विमान नियम 2017 आणि आंतरराष्ट्रीय नागरी विमान वाहतूक संघटनेच्या (ICAO) मानकांनुसार केली जात असल्याचं ब्युरोने सांगितलं. अपघाताचे मूळ कारण शोधण्यासाठी तांत्रिक पथके घटनास्थळावरून मिळालेल्या पुराव्यांचे विश्लेषण करत आहेत.

या विमानामध्ये दोन स्वतंत्र फ्लाईट रेकॉर्डर्स (Black Box) बसवण्यात आले होते. अपघाताच्या वेळी लागलेल्या भीषण आगीमुळे हे दोन्ही रेकॉर्डर्स दीर्घकाळ उष्णतेच्या संपर्कात होते, ज्यामुळे त्यांचे बाह्य नुकसान झाले आहे. तपासाच्या दृष्टीने अत्यंत महत्त्वाचे असलेले हे 'ब्लॅक बॉक्स' आता प्रयोगशाळेत तपासणीसाठी पाठवण्यात आले आहेत. विमान दुर्घटना तपास ब्युरो या प्रकरणाचा तपास अत्यंत निष्पक्ष आणि पुराव्यांच्या आधारावर करत आहे.

डिजिटल फ्लाईट डेटा रेकॉर्डर (DFDR) मधील माहिती यशस्वीरित्या डाऊनलोड करण्यात एएआयबीच्या प्रयोगशाळेला यश आले आहे. मात्र, कॉकपिट व्हॉईस रेकॉर्डर (CVR) ची स्थिती अधिक गंभीर असल्याने त्याची तांत्रिक तपासणी अजूनही सुरू आहे. यातील डेटा मिळवण्यासाठी आता थेट उत्पादक देशाच्या प्रतिनिधींशी संपर्क साधून विशेष तांत्रिक मदत घेतली जात आहे. तपासाची प्रक्रिया पूर्णतः पारदर्शक ठेवली जाईल आणि योग्य टप्प्यावर याबद्दलची अधिकृत माहिती सर्वांशी शेअर केली जाईल, असे आश्वासन ब्युरोने दिले आहे.