Alandi Kartiki Yatra 2025 : विठ्ठल नामात रंगली आळंदी! कार्तिकी यात्रेनिमित्ताने वाहतुकीत मोठा बदल, कुठं रस्ता बंद, पर्यायी मार्ग कोणते?

श्री क्षेत्र आळंदीमध्ये ही यात्रा 12 ते 20 नोव्हेंबर दरम्यान भरणार आहे. त्यातही 15 नोव्हेंबर रोजी कार्तिकी एकादशी आणि 17 नोव्हेंबर रोजी संत ज्ञानेश्वर महाराजांचा संजीवन समाधी सोहळा असल्यामुळे महाराष्ट्र आणि देशभरातून भाविकांची मोठी गर्दी अपेक्षित आहे. गर्दी आणि वाहतूक कोंडी टाळण्यासाठी काही मार्गांवर जड अवजड वाहनांना प्रवेश बंदी घालण्यात आली आहे.

12 ते 20 नोव्हेंबर दरम्यान अत्यावश्यक सेवा आणि दिंडीतील वाहने वगळता सर्व जड अवजड वाहनांसाठी काही मार्ग बंद राहतील. त्यात मोशी चौक, भारतमाता चौक, चिंबळी फाटा तसेच आळंदी फाटा, माजगाव फाटा, भोसे फाटा, चाकण-वडगाव घेणंद मार्ग, मरकळ मार्ग, पुणे-दिघी मॅगझीन चौक मार्ग यावरून येणाऱ्या वाहनांसाठी पर्यायी मार्ग उपलब्ध आहेत तर देहूगाव कमान, कॅनबे चौक आणि तळेगाव-चाकण रोडवरील काही रस्त्यांवरही प्रवेश बंद राहील. वाहनांना जयगणेश साम्राज्य चौक, अलंकापुरम चौक, भोसरी चौक मॅगझीन चौक, कोयाळी कमान, कोयाळी मरकळगाव मार्गे पर्यायी मार्ग वापरावे लागतील.

सर्व वाहनांना त्यात पण अत्यावश्यक सेवा आणि दिंडीतील वाहने वगळता पुणे-आळंदी, मोशी-आळंदी, चिंबळी-आळंदी, चाकण (आळंदी फाटा)-आळंदी, वडगाव घेणंद-आळंदी, मरकळ-आळंदी मार्गांवर प्रवेश बंद राहील.

आळंदीहून निघणाऱ्या एस.टी आणि पीएमपीएमएल बससेवांसाठी प्रशासनाने ठराविक थांबे ठरवले आहेत. त्यात पण सर्व बसेससाठी योगिराज चौक हा मुख्य स्टँड असेल तर देहूगावकडे जाणाऱ्या बससाठी डुडुळगाव जकातनाका, पुणे दिशेकडे चऱ्होली फाटा, वाघोली आणि शिक्रापूरकडे धानोरे फाटा, चाकणकडे इंद्रायणी हॉस्पिटल परिसर तर शिक्रापूर, शेलपिंपळगाव आणि नगरकडे जाणाऱ्या बससाठी विश्रांतवड-वडगाव रोड हे ठिकाण निश्चित करण्यात आले आहेत.