खरातची संगत महागात, रुपाली चाकणकरांनी आता महिला प्रदेशाध्यपदाचा दिला राजीनामा, सुनेत्रा पवारांचा दुसरा मोठा निर्णय

दरम्यान, रुपाली चाकणकर यांनी महिला आयोगाच्या अध्यक्षपदाचा राजीनामा दिल्यानंतर राष्ट्रवादीच्या नेत्या रुपाली ठोंबरे, नाशिकचे पदाधिकारी आणि ठाकरे गटाच्या नेत्या सुषमा अंधारे यांनी रुपाली चाकणकर यांच्या राष्ट्रवादीच्या महिला प्रदेशाध्यक्षपदाचा राजीनामा द्यावा, अशी मागणी लावून धरली होती. रुपाली ठोंबरे यांनी उपमुख्यमंत्री सुनेत्रा पवार यांची भेटही घेतली होती. त्यानंतर राष्ट्रवादीची बैठक पार पडली होती. या बैठकीमध्ये आमदारांनी रुपाली चाकणकर यांच्या राजीनाम्याची मागणी केली होती. त्यानंतर आता अखेरीस रुपाली चाकणकर यांनी ट्वीट करून राजीनामा दिला आहे.

दरम्यान, राष्ट्रवादीच्या नेत्या  रूपाली ठोंबरे यांनी रुपाली चाकणकर यांच्यावर गंभीर आरोप केले आहे. "ज्या पीडित महिला कौटुंबिक हिंसाचार किंवा घरगुती वादाच्या तक्रारी घेऊन महिला आयोगाकडे न्याय मागण्यासाठी येत होत्या, त्यांचे योग्य समुपदेशन करणे आयोगाचे कर्तव्य होते. मात्र, रूपाली चाकणकर या महिलांना दिलासा देण्याऐवजी तुम्ही अशोक खरात बाबाकडे जा, तुमचे प्रश्न सुटतील, असा अजब सल्ला देत होत्या. न्यायाच्या आशेने आलेल्या महिलांना जाणीवपूर्वक भोंदू बाबाच्या जाळ्यात ढकलण्याचे पाप आयोगाच्या खुर्चीवर बसून झाले आहे, असा गंभीर आरोप ठोंबरे यांनी केला होता. तसंच, खरात प्रकरणामध्ये रूपाली चाकणकर या खरातच्या काळ्या कृत्यांमध्ये सामील आहेत का? याची सखोल चौकशी व्हावी आणि त्यांना या प्रकरणात सहआरोपी करण्यात यावं, अशी मागणीही ठोंबरे यांनी केली.