मुलींचं धर्मांतरण अन् 'मुंबई'पर्यंत सप्लाय! भोपाळच्या झोपडपट्टीतील अमरीन-आफरीनचा लग्झरी विला पाहून पोलीसही चक्रावले; धक्कादायक रॅकेट उघड

अमरीन आणि आफरीन अशी अटक करण्यात आलेल्या बहिणींची नावं आहेत. काही काळापूर्वी भोपाळच्या अब्बास नगरमधील एका झोपडीत राहणाऱ्या या बहिणींनी या काळ्या धंद्यातून इतकी माया जमवली की, त्यांनी सागर रॉयल विलासारख्या पॉश भागात स्वतःचा आलिशान विला खरेदी केला. अत्यंत महागडी जीवनशैली जगणाऱ्या या बहिणी गरीब मुलींना आपल्या जाळ्यात ओढत होत्या.

छत्तीसगड आणि भोपाळमधील दोन पीडित मुलींनी धाडस दाखवून पोलिसांकडे तक्रार केली, तेव्हा हे प्रकरण उघडकीस आलं. या मुलींनी दिलेल्या माहितीनुसार: सुरुवातीला मदतीच्या नावाने किंवा घरकामासाठी मुलींना बोलावलं जायचं. त्यांना हाय-प्रोफाईल जीवनशैलीची स्वप्नं दाखवून मोठ्या पार्ट्यांमध्ये नेलं जायचं. तिथे रईसजाद्यांसोबत शारीरिक संबंध ठेवण्यासाठी मुलींवर दबाव आणला जायचा. तसंच त्यांना दारू आणि एमडी (MD) सारखे ड्रग्ज घेण्यास भाग पाडलं जायचं.

या प्रकरणातील तिसरा आरोपी चंदन यादव याने स्वतः इस्लाम स्वीकारला होता. तो पीडित मुलींना "मुस्लिम व्हा, मी तुमची चांगली लग्न लावून देतो" असं आमिष दाखवायचा. एका पीडितेनं सांगितलं की, चंदनने तिच्यावर बलात्कार केला आणि नंतर तिला बुरखा घालण्यासाठी आणि नमाज पठण करण्यासाठी सक्ती करण्यात आली.

अमरीनच्या मोबाईलमध्ये अनेक संशयास्पद व्हॉट्सॲप ग्रुप्स आढळले आहेत, ज्यात मुलींचे फोटो आणि व्यवहार केल्याचे चॅट्स आहेत. या मुलींना महिन्याला १० हजार रुपये देऊन गुजरात आणि मुंबईला पाठवले जात असे. तिथे त्यांचे शोषण केले जात होते.

पोलिसांनी अमरीन, आफरीन आणि चंदन यादव यांना अटक केली असून बिलाल, चानू आणि यासिर या तीन फरार आरोपींचा शोध सुरू आहे. पीडितांनी सांगितलं की, तक्रार केल्यास त्यांना जीवे मारण्याची आणि बदनामी करण्याची धमकी देण्यात आली होती.