पुण्यात यंदा प्लास्टर ऑफ पॅरिसच्या मूर्तींना मागणी, विक्रेत्यांनी सांगितलं यामागचं कारण, VIDEO

पुणे : आता सर्वत्र गणरायाच्या आगमनाचे वेध लागले आहे. या निमित्ताने बाजारपेठाही फुलून गेल्या आहेत. यंदा देखील प्लास्टर ऑफ पॅरिसच्या मुर्तींना बाजारात चांगली मागणी असल्याचे चित्र पाहायला मिळत आहे. याचबाबत लोकल18 चा हा आढावा.

बाजारात प्लास्टर ऑफ पॅरिसच्या मूर्तींना मागणी वाढली आहे. त्यांच्या किमतीही शाडूच्या मूर्तीपेक्षा कमी असल्याने नागरिक त्याचीच खरेदी करत आहेत. यंदा बाजारात जवळपास 80 टक्के पीओपी, 15 टक्के शाडू माती आणि 5 टक्के कागदी लगद्यापासून तयार केलेल्या घरगुती गणेशमूर्ती आहेत.

पीओपीपासून तयार केलेली गणेशमूर्ती हाताळणे सूकर होते. शाडू मातीपासून तयार केलेली गणेशमूर्ती अत्यंत जपावी लागते. शहरातून बाहेरगावी गणेशमूर्ती नेत असताना रस्त्यात खड्डे असल्यामुळे मूर्तीला हादरे बसतात. मात्र, ‘पीओपी’ गणेशमूर्तीचा भंग होत नाही. शाडू मातीच्या मूर्तीपेक्षा पीओपीची गणेशमूर्ती ही वजनाने हलकी आणि मजबूत असते. त्यामुळे यंदाही नागरिकांचा पीओपीपासून तयार केलेल्या गणेशमूर्ती घेण्याकडे कल आहे, अशी माहिती मूर्ती विक्रेते अंकुश गोलांडे यांनी दिली.