Pune : पुण्यातला सर्वात मोठा स्कॅम! RTO च्या नावे बँक खातं रिकामं,व्यावसायिकासोबत जे घडलं ते तुमच्यासोबत घडू  घडू शकतं

पुण्यातील एका व्यावसायिकाला अशाच बनावट मेसेजचा मोठा फटका बसला असून त्याच्या खात्यातून तब्बल 2 लाख 55 हजार रुपये गायब झाले आहेत. कात्रजमधील खोपडेनगर भागात राहणाऱ्या 40 वर्षीय व्यावसायिकाला व्हॉट्सअ‍ॅपवर आरटीओ चलन असा मेसेज आला. त्यासोबत एपीके नावाची फाईलही होती. त्यांनी ती फाईल उघडली असता त्यात त्यांच्या वाहनावर 500 रुपयांचा दंड असल्याचं दिसलं. त्यानंतर लगेचच त्या मेसेजमध्ये क्लिक करा अशी सूचना आली. त्यांनी विचार न करता त्या लिंकवर क्लिक केलं. त्यानंतर त्यांना काहीही संशय आला नाही आणि ते गणेश विसर्जनासाठी बाहेर गेले.

दुपारी साडेबारा वाजता ही घटना घडली आणि सायंकाळी चारच्या सुमारास जेव्हा ते घरी परतले, तेव्हा त्यांच्या बँक खात्यातून तब्बल 5 व्यवहार होऊन 2 लाख 55 हजार 43 रुपये काढण्यात आले होते. त्यांनी लेच बँकेत कॉल केला आणि पैसे दुसऱ्या खात्यात ट्रान्सफर करण्याचा प्रयत्न केला, मात्र ते शक्य झालं नाही. तपास घेतल्यावर लक्षात आलं की ही संपूर्ण फसवणूक त्या बनावट एपीके फाईलमुळे झाली होती.

पोलिसांनी सर्व नागरिकांना इशारा दिला आहे की, अशा एपीके फाईल्स किंवा अनोळखी लिंकवर कधीही क्लिक करू नका. अधिकृत RTO वेबसाइट किंवा सरकारी पोर्टलवरच चलनाची माहिती तपासा. व्हॉट्सअ‍ॅपवरून येणारे आरटीओ मेसेजेस, फाईल्स किंवा लिंक्सवर विश्वास ठेऊ नका. जर अशा प्रकारचा मेसेज आला, तर तो लगेच डिलीट करा आणि सायबर हेल्पलाइन वर संपर्क साधा.