Pune : पुण्याच्या रस्त्यावर गुंडांचा हैदोस, तरुणाला किडनॅप केलं, विवस्त्र करून हल्ला, गोळीबारही केला!

पोलिसांनी दिलेल्या माहितीनुसार वाहन खरेदी-विक्री व्यवसायात सहभागी असलेला पीडित हादेखील कोंढवा भागात राहत होता आणि आरोपींच्या परिचित होता. 31 डिसेंबर रोजी त्यांच्यात आर्थिक व्यवहारांवरून वाद झाला. या वादादरम्यान आरोपींनी पीडित तरुणावर हल्ला केला आणि त्याला जबरदस्तीने कारमधून घेऊन गेले.

रात्री 11 वाजण्याच्या सुमारास पीडित तरुणाला कात्रज-कोंढवा रोडवरील गोकुळनगर परिसरात एका मोकळ्या मैदानावर नेण्यात आलं. तिथे आरोपींनी तरुणाला विवस्त्र केलं आणि त्याला बेदम मारहाण केली. आरोपींनी या हल्ल्याचा व्हिडिओ रेकॉर्ड केला. पोलिसांकडे तक्रार केली तर हा व्हिडिओ सोशल मीडियावर अपलोड करू अशी धमकी आरोपींनी पीडित तरुणाला दिली. यानंतर एका आरोपीने गाडीत ठेवलेले पिस्तूल बाहेर काढले आणि पीडित तरुणाला धमकावले आणि गोळीबारही केला.

मानसिक धक्का बसलेला असतानाही पीडित तरुण रविवारी येवलेवाडी पोलीस स्टेशनमध्ये आला आणि त्याने तक्रार दाखल केली. त्यानंतर पोलिसांनी वेगवेगळ्या कलमांखाली गुन्हा दाखल केला. माहिती मिळाल्यानंतर वरिष्ठ पोलीस निरीक्षक अमर कलंगे यांनी घटनास्थळी भेट दिली. तर पोलीस उपनिरीक्षक खराडे यांच्यावर तपासाची जबाबदारी सोपवण्यात आली आहे.

या घटनेमुळे पुण्यात वाढत असलेल्या गुन्हे पुन्हा एकदा अधोरेखित झाले आहेत. पोलिसांच्या नोंदींवरून मागच्या वर्षी शहरात 79 हत्या, 153 हत्येचे प्रयत्न आणि 1,453 गंभीर गुन्हे घडले आहेत. 2024 च्या तुलनेत गंभीर गुन्ह्यांमध्ये 14 ते 15 टक्क्यांची घट झाल्याचा दावा अधिकाऱ्यांनी केला आहे. पण हत्या, हल्ले आणि सार्वजनिक ठिकाणी होणाऱ्या गुन्ह्यांच्या घटनांमुळे रहिवाशांमध्ये भीतीचं वातावरण आहे.