खासगी शाळेचा मनमानी कारभार; रस्त्यावर अडवल्या गाड्या, हिंजवडी आयटी पार्कमध्ये 3 तास वाहतुकीचा बोजवारा

शाळेच्या सहलीसाठी मुलांना सोडण्याकरिता पालकांना संध्याकाळची वेळ देण्यात आली होती. यावेळी शाळेच्या सुरक्षारक्षकांनी थेट रस्त्यावर येत दादागिरीने दोन्ही बाजूकडील वाहनांची वाहतूक थांबवली. त्यानंतर शाळेच्या बस आणि पालकांच्या मोटारी पुढे सोडण्यात आल्या. या पद्धतीच्या मनमानी कारभारामुळे रस्त्यावरील वाहतूक व्यवस्था पूर्णपणे कोलमडली.

या कोंडीचा सर्वाधिक फटका आयटी कर्मचाऱ्यांच्या पदरी पडला. भूमकर चौक ते कस्तुरी चौक आणि पुढे हॉटेल परिसरापर्यंत वाहनांची अक्षरश: इंच-इंच गती होती. विकेंडच्या तोंडावर हा प्रकार घडल्यामुळे घरी जाणाऱ्या हजारो आयटी कर्मचाऱ्यांना मोठा मनस्ताप सहन करावा लागला. या घटनेमुळे आयटी पार्क परिसरातील वाहतूक व्यवस्थापन पुन्हा एकदा निकामी ठरल्याचे स्पष्ट झाले आहे.