Indigo Crisis: इंडिगोच्या गोंधळामुळे हवाई प्रवाशांची लूट! पुणे-मुंबई तिकीट दर चक्क 1 लाखावर, या मार्गांवरही दरवाढ

सर्वाधिक धक्कादायक बाब म्हणजे, एअर इंडियाच्या पुणे-मुंबई या एकाच उड्डाणाचे तिकीट दर तब्बल एक लाख रुपयांवर पोहोचले आहेत. त्याचप्रमाणे, नागपूर-मुंबई या मार्गावरील विमानांसाठी देखील ३० हजार रुपयांहून अधिक भाडे आकारले जात असल्याचे समोर आलं आहे. पुणे-मुंबई आणि नागपूर-पुणे या मार्गांवरील दरही याच दरम्यान ३० हजार रुपयांच्या वर गेले आहेत.

गेल्या काही दिवसांपासून इंडिगोचे वेळापत्रक पूर्णपणे बिघडले असून, पुणे विमानतळाला त्याची सर्वाधिक झळ बसली आहे. शुक्रवारी इंडिगोची एकूण ४६ उड्डाणे रद्द झाली होती. यात दिल्ली, नागपूर, चेन्नई, कोची, बंगळूरू, रांची यांसारख्या शहरांतून पुणे येथे येणाऱ्या २३ आणि पुण्याहून बाहेरील राज्यांमध्ये जाणाऱ्या २३ उड्डाणांचा समावेश होता. अनेक उड्डाणांचे वेळापत्रक दिवसभरात अनेकदा बदलण्यात आले, त्यामुळे प्रवाशांमध्ये प्रचंड गोंधळ आणि संतापाचे वातावरण निर्माण झाले होते.