जेजुरीत लव्ह ट्रँगल! प्रेयसीनं दुसऱ्याशी लग्न केल्यानं वैतागला प्रियकर, प्रेमाचा हादरवणारा शेवट

या खुनात दीपक गोरख जगताप (रा. राजेवाडी, ता. पुरंदर) या तरुणाचा मृत्यू झाला आहे. खून करून फरार झालेल्या आरोपीचं नाव सुशांत संदीप मापारी (रा. माळशिरस, ता. पुरंदर, मूळ रा. राहू, ता. दौंड) असं आहे, अशी माहिती जेजुरी पोलिसांनी दिली आहे. पोलीस आरोपीचा कसून शोध घेत आहेत.

मात्र, पायलचा पहिला प्रियकर सुशांत मापारी याला त्यांचं लग्न मान्य नव्हतं. त्याने सातत्याने दीपक आणि पायलच्या मोबाईलवर फोन तसेच व्हॉट्सअॅप कॉल करून 'मी पायलशी लग्न करणार होतो, तुम्ही दोघांनी लग्न का केलं?' असं म्हणत जीवे मारण्याची धमकी देत होता. दीपकने ही बाब आपल्या कुटुंबियांना सांगितली होती.

सुशांतने दीपकला माळशिरस गावच्या रामकाठी शिवारात बोलावून घेतले. याच ठिकाणी आरोपीने दीपकच्या डोक्यावर आणि मानेवर धारदार कोयत्याने सपासप वार करून त्याचा निर्घृण खून केला. खून केल्यानंतर आरोपी कोयता घटनास्थळीच टाकून दुचाकीवरून पसार झाला. दीपक घरी न परतल्याने आणि त्याचा मोबाईल बंद असल्याने नातेवाईकांनी शोध सुरू केला. त्यावेळी माळशिरस गावच्या रामकाठी शिवारात दीपकचा मृतदेह रक्तबंबाळ अवस्थेत आढळून आला. घटनास्थळी दीपक आणि आरोपी सुशांत या दोघांच्या दुचाकी पोलिसांना सापडल्या आहेत.

या खुनाबाबतची फिर्याद मयत दीपकचे मामा संतोष शेंडकर (रा. चांबळी, ता. पुरंदर) यांनी जेजुरी पोलीस ठाण्यात दिली आहे. पोलीस उपनिरीक्षक महेश पाटील पुढील तपास करत आहेत.