Pune – Nagpur Railway: प्रवाशांसाठी खूशखबर! पुणे – नागपूर, कोल्हापूर – नागपूर गाड्यांबाबत रेल्वेचा मोठा निर्णय

पुणे – नागपूर आणि कोल्हापूर – नागपूर या दोन्ही गाड्या पुणे रेल्वे विभागातून दररोज धावतात. पुण्यातून विदर्भात जाणारी दैनंदिन प्रवासी संख्या मोठी असून धावणाऱ्या रेल्वे गाड्यांची संख्या कमी आहे. त्यामुळे अनेक प्रवासी नाइलाजाने खासगी बसमधून प्रवास करतात. पुणे ते नागपूरदरम्यान ट्रेनचे तिकीट जनरल 160, स्लीपर 380 रुपये आहे. तर खासगी ट्रॅव्हल्सला दीड ते दोन हजार रुपये मोजावे लागतात. अनेक वेळा रेल्वे गाड्यांना मोठी गर्दी असल्याने प्रवाशांना गैरसोयीचा सामना करावा लागतो. त्यामुळे दोन्ही गाड्यांना जनरल डब्यांची संख्या वाढवण्याची मागणी होत होती.

दरम्यान, गेल्या अनेक दिवसांपासून रेल्वे गाड्यांचे डबे वाढवम्याची मागणी प्रवाशांकडून होत होती. त्यामुळे पुणे – नागपूर आणि कोल्हापूर – नागपूर या दोन्ही गाड्यांचे डबे वाढवण्याचा निर्णय घेतला असून याचा फायदा प्रवाशांना होईल, असे पुणे विभागाचे जनसंपर्क अधिकारी हेमंत कुमार बेहेरा यांनी सांगितले.