Pune News : मेट्रो बांधकाम प्रकल्पात पर्यावरणाचा बोजवारा; टाटा प्रोजेक्ट्सला PMC कडून कठोर दंड; नेमकं प्रकरण काय?

अलीकडेच हिंजवडी-शिवाजीनगर मेट्रो प्रकल्पाच्या कामातून निघालेला कचरा बालेवाडी हायस्ट्रीटसमोरील मोकळ्या जागेत टाकण्यात आला. महापालिकेची परवानगी न घेता सरळ 70 ट्रक एवढा मोठा कचरा येथे टाकल्याचे उघड झाले. त्यामुळे या परिसराचे विद्रूपीकरण झाले असून प्रदूषणातही वाढ झाली.

शहरातील कचऱ्याचा प्रश्न दिवसेंदिवस गंभीर होत चालला आहे. नागरिकांना रस्त्यांवर आणि मोकळ्या जागांवर टाकण्यात येणाऱ्या कचऱ्यामुळे मोठा त्रास सहन करावा लागतो. कचऱ्याचे ढीग उभे राहिल्याने वाहतुकीत अडथळे निर्माण होतात, धूळ उडते, तसेच आरोग्यावरही वाईट परिणाम होतो. त्यामुळे महापालिकेने आधीच अशा प्रकारांवर कडक कारवाई करण्याचे आदेश दिले आहेत.

या प्रकरणात औंध-बाणेर क्षेत्रीय कार्यालयाचे सहाय्यक आयुक्त गिरीष दापकेकर यांनी तपास केला. तपासादरम्यान एमएच 12 एक्सएन 1301 आणि एमएच 12 एक्सएम 8049 या दोन डंपरमधून कचरा येथे आणल्याचे स्पष्ट झाले. महापालिकेची परवानगी न घेता असे कृत्य केल्याने कायद्याचा भंग झाला आहे.

त्यामुळे महापालिकेने सरळ टाटा प्रोजेक्ट कंपनीला 15 लाख रुपयांचा दंड ठोठावला. हा दंड त्वरित भरण्याचे निर्देशही देण्यात आले आहेत. ही कारवाई म्हणजे शहरातील बांधकाम कंपन्यांना दिलेला इशाराच मानला जात आहे.

महापालिकेचे अधिकारी सांगतात की, शहरात मोकळ्या जागांवर कचरा टाकल्यामुळे पर्यावरणावर गंभीर परिणाम होतो. अनेकदा नागरिक तक्रारी करतात, पण जबाबदार कंपन्या मात्र दुर्लक्ष करतात. त्यामुळे आता कठोर पावले उचलली जात आहेत.

हिंजवडी-शिवाजीनगर मेट्रो प्रकल्पाचे काम पुण्यासाठी महत्त्वाचे असले तरी त्यातून निघणारा कचरा व्यवस्थित व्यवस्थापित करणे आवश्यक आहे. पुढे असे प्रकार घडू नयेत म्हणून महापालिकेने इशारा दिला आहे. नियम मोडणाऱ्यांवर दंडात्मक कारवाई सुरूच राहणार आहे.