Pune News : दिवाळीपूर्वी प्रवाशांना एसटीची मोठी भेट, करता येणार मनसोक्त प्रवास

आवडेल तेथे प्रवास योजना ही एसटी प्रवाशांसाठी अत्यंत सोयीची योजना ठरली आहे. या योजनेअंतर्गत प्रवासी चार किंवा सात दिवसांच्या कालावधीत राज्यातील कोणत्याही भागात अमर्याद प्रवास करू शकतात. या पासमुळे प्रवाशांना दरवेळी वेगळे तिकीट काढण्याची गरज भासत नाही आणि त्यातून मोठ्या प्रमाणात पैशांची बचत होते. मात्र, आधी या योजनेतील काही अटींमुळे आणि उच्च दरांमुळे अनेकांना या सुविधेचा लाभ घेता येत नव्हता. त्यामुळे महामंडळाने आता दरांमध्ये कपात करण्याचा निर्णय घेतला असून या बदलामुळे प्रवाशांचा प्रतिसाद वाढण्याची अपेक्षा व्यक्त करण्यात येत आहे.

आवडेल तेथे प्रवास योजनेचा लाभ घेण्यासाठी कोणत्याही एसटी बसस्थानकातील पास खिडकीवर जाऊन आवश्यक रक्कम भरून पास काढावा लागतो. त्यानंतर प्रवाशाला ओळखपत्रासह पास दिला जातो. हा पास चार किंवा सात दिवस वैध असतो आणि त्या कालावधीत कोणत्याही बसने राज्यभर मुक्तपणे प्रवास करता येतो.

स्वारगेट आगाराचे व्यवस्थापक प्रमोद धायतोंडे यांनी सांगितले की, भाडेकपातीमुळे दैनंदिन प्रवास करणाऱ्यांना आणि पर्यटनासाठी जाणाऱ्यांना मोठा दिलासा मिळणार आहे. ही योजना अत्यंत लोकप्रिय ठरत आहे.