Purandar Airport: पुरंदर विमानतळाबाबत महत्त्वाची अपडेट, जमीन मोजणीस प्रारंभ, किती शेतकऱ्यांची संमती?

पुरंदर तालुक्यातील पारगाव मुंजवडी, उदाचीवाडी, एखतपूर, खानवडी, वनपुरी आणि कुंभारवळण या सात गावांतून प्रस्तावित विमानतळासाठी सुमारे 3 हजार एकर जमिन घेण्यात येत आहे. यासाठी शेतकऱ्यांना संमतीपत्रे सादर करण्यासाठी 26 ऑगस्ट ते 18 सप्टेंबरपर्यंत कालावधी देण्यात आला होता. या काळात तब्बल 2 हजार 80 शेतकऱ्यांनी पुढाकार घेत 2 हजार 700 एकर जमिनीबाबत संमती दिली. मात्र, जवळपास 300 एकर जमिनीबाबत संमतीपत्रे प्राप्त झाली नाहीत. ज्यांनी होकार दिला नाही, त्या शेतकऱ्यांना विकसित भूखंडाचा लाभ मिळणार नसल्याचे प्रशासनाकडून स्पष्ट करण्यात आले होते.

पुरंदर विमानतळ प्रकल्पासाठी शेतकऱ्यांनी मोठ्या प्रमाणावर सहमती दर्शविली आहे. सुरुवातीला काही शेतकऱ्यांनी संमतीपत्रे दिली नसल्याने त्यांनाही लाभ मिळावा, यासाठी मुदतवाढ मागणी करण्यात आली होती. प्रशासनाने ही मुदत गुरुवारपर्यंत (25 सप्टेंबर) वाढविली.या वाढीव मुदतीत आणखी संमतीपत्रे सादर झाल्याने आतापर्यंत 2 हजार 810 एकर क्षेत्रासाठी परवानगी मिळाली आहे. एकूण 3 हजार 220 शेतकऱ्यांनी भूसंपादनास होकार दिला असून, यामुळे प्रस्तावित क्षेत्राच्या तब्बल 93 टक्के भागाला संमती मिळाल्याचे स्पष्ट झाले आहे. पुढे संमतीपत्रे सादर करण्यासाठी कोणतीही अतिरिक्त मुदत दिली जाणार नसल्याचे प्रशासनाने स्पष्ट केले.