Pune Crime: आधी वाटलं 'ती पाय घसरून पडली', पण शेवटी निघालं 'कांड'! पुण्यातील वैष्णवीच्या मृत्यूमागे पतीचाच भयंकर कट

वैष्णवी ऊर्फ वर्षा तुषार तुपसौदर्य (वय २३) असे खून झालेल्या दुर्दैवी विवाहितेचे नाव आहे. सुरुवातीला तिचा मृत्यू हा नैसर्गिक किंवा अपघाती असल्याचा दावा सासरच्या मंडळींकडून करण्यात आला होता. या माहितीच्या आधारे पोलिसांनी सुरुवातीला 'अकस्मात मृत्यू' अशी नोंद केली होती. मात्र, वैष्णवीच्या शरीरावरील खुणा आणि घटनास्थळावरील संशयास्पद बाबींमुळे खडक पोलिसांना संशय आला.

सहाय्यक पोलीस निरीक्षक अनिता लतोंडे आणि त्यांच्या पथकाने या प्रकरणाचा सखोल तपास सुरू केला. शवविच्छेदन अहवाल आणि तांत्रिक पुराव्यांच्या आधारे, वैष्णवीचा मृत्यू पडल्यामुळे झाला नसून तिचा खून केल्याचे निष्पन्न झाले. पती तुषारने आपल्या साथीदारांच्या मदतीने पुरावे नष्ट करत वैष्णवी पडल्याचा बनाव रचला होता, जेणेकरून तो पोलिसांच्या नजरेतून सुटू शकेल.

याप्रकरणी खडक पोलिसांनी खुनाचा गुन्हा दाखल करून पती तुषार ऊर्फ गणेश विलास तुपसौदर्य (२८), मनोज रोहिदास कांबळे (३९) आणि वनिता मनोज कांबळे (३२) यांना अटक केली आहे. कौटुंबिक वादातून हा प्रकार घडला असावा, असा प्राथमिक अंदाज आहे.