Pune Police Bharati 2024 : पुणे पोलीस प्रशासन भरतीसाठी सज्ज, 'या' मैदानावर पार पडणार भरती प्रक्रिया, महत्त्वाची माहिती

या मेगा भरतीसाठी पुणे पोलिसांनी देखील तयारी केली आहे. पुण्यात पुणे शहर, ग्रामीण, लोहमार्ग पोलीस दल, कारागृह विभागातील 1 हजार 219 पदांसाठी भरती प्रक्रिया उद्यापासून राबवली जाणार आहे. या जागांसाठी तब्बल 1 लाख 81 हजार 769 उमेदवारांनी अर्ज दाखल केले आहेत. त्यामुळे पुण्यात भरतीसाठी मोठी स्पर्धा आहे. ही भरती प्रक्रिया पुण्यातील शिवाजीनगर पोलीस मुख्यालय, पाषाण रस्त्यावरील ग्रामीण पोलिसांचे चव्हाणनगर येथील मुख्यालयात आणि खडकीतील लष्कराच्या दारूगोळा कारखान्याच्या मैदानावर पार पडणार आहे.

अर्ज केलेल्या उमेदवारांमध्ये 2 तृतीयपंथी उमेदवारांचाही समावेश आहे. लेखी परीक्षा आणि मैदानी शारीरिक चाचणी अशा दोन टप्प्यात ही भरती प्रक्रिया पार पडणार आहे. उद्या 19 जून ते 10 जुलै 2024 दरम्यान याचे आयोजन करण्यात आले आहे. या पोलीस भरती प्रक्रियेमध्ये उमेदवारांना काही अडचणी आल्यास त्याचे निरासन स्थानिक पातळीवर करण्याची सोयदेखील पोलीस प्रशासनाने केली आहे.