'मॅडम, तूम बाजू हो ना' बायकोशी भांडण करून नवरा पोहोचला मृत्यूच्या दारात, पुणे पोलिसाच्या 'मार्शल'ने तिथून आणलं परत!

पोलिसांनी दिलेल्या माहितीनुसार, पुण्यातील कोंढवा परिसरात मिठानगर परिसरात ही घटना घडली.  साजिद तांबोळी असं आत्महत्येचा प्रयत्न करणाऱ्या इसमाचं नाव आहे. सदरील व्यक्ती साजिद तांबोळी आणि त्याची पत्नी यास्मिन तांबोळी या दाम्पत्यामध्ये कुठल्या तरी कारणावरून कडाक्याचं भांडणं झालं होतं. या वादातून साजिद तांबोळी हे बेडरूममध्ये गेले आणि दार लावून घेतलं. बराचं वेळ झाल्यामुळे साजिद बाहेर येईना. त्यामुळे यास्मिन तांबोळी यांनी पोलिसांनी फोन करून माहिती दिली.

दिवसाच्या ड्युटीवर असताना कोंढवा मार्शलचे पोलीस अंमलदार पोलीस अंमलदार निकम आणि पीसी ४४१ राक्षे यांना मिठा नगर परिसरातून एका घरगुती भांडणाचा तातडीचा कॉल प्राप्त झाला. घटनेचे गांभीर्य ओळखून हे दोन्ही अंमलदार तातडीने घटनास्थळी पोहोचले.

दरवाजा तोडल्यानंतर साजिद तांबोळी यांनी फॅनला गळफास घेतला असल्याचं निदर्शनास आलं. त्यांनी तातडीने साजिद तांबोळी यांना खाली उतरवलं. त्यांना लगेच सीपीआर दिला. त्यामुळे तांबोळी यांचा जीव थोडक्यात वाचला. शुद्धीवर आल्यानंतर तांबोळी यांना तातडीने रुग्णालयात दाखल केलं. त्यांची प्रकृती आता ठीक आहे.  पोलीस अंमलदार निकम आणि राक्षे यांनी दाखवलेली तत्परता आणि योग्य वेळी दिलेल्या 'सीपीआर'मुळे (CPR) एका कुटुंबाचा आधार वाचला असून पुणे पोलीस दलाच्या या कामगिरीचे सर्वत्र कौतुक होत आहे.