Police Bharti : नोकरीची सुवर्णसंधी! पुणे पोलीस दलात 'मेगा भरती'; 2000 जागांसाठी 2,20,000 अर्ज

पुणे शहर पोलीस दलाच्या माध्यमातून पोलीस शिपाई, पोलीस शिपाई (वाहनचालक), बँडसमन आणि कारागृह विभागातील शिपाई अशा विविध पदांसाठी ही भरती प्रक्रिया सुरू आहे. या विविध पदांच्या सुमारे दोन हजार जागांसाठी (अचूक आकडा १,९०१) अर्ज मागविण्यात आले होते. या जागांसाठी २ लाख १९ हजार ९२७ अर्ज ऑनलाइन पद्धतीने प्राप्त झाले आहेत. यामुळे पुणे शहर पोलीस दलात समाविष्ट होण्यासाठी तरुणांमध्ये मोठी चुरस निर्माण झाली आहे.

पोलीस शिपाई (Police Constable): १७३३ पदे

या पदांसाठी ऑनलाइन अर्ज सादर करण्याची अंतिम मुदत सुरुवातीला ३० नोव्हेंबरपर्यंत देण्यात आली होती. मात्र, तांत्रिक अडचणी आणि विद्यार्थ्यांची मागणी लक्षात घेऊन या मुदतीत वाढ करण्यात आली होती आणि ती ७ डिसेंबरपर्यंत वाढविण्यात आली. मुदतवाढीमुळे अधिकाधिक उमेदवारांना अर्ज करण्याची संधी मिळाली, परिणामी अर्जांची संख्या २ लाखांहून अधिक झाली.

महाराष्ट्र शासनाच्या निर्णयानुसार, राज्यात मुंबई, पुणे, पिंपरी-चिंचवडसह अन्य ठिकाणी पोलीस भरती प्रक्रिया एकाच दिवशी आणि एकाच वेळी राबविण्यात येत आहे. यामुळे भरती प्रक्रियेत पारदर्शकता आणि एकसूत्रता आणण्यास मदत झाली आहे. पुणे शहर पोलीस दलात अर्ज केलेल्या या लाखो उमेदवारांना आता शारीरिक चाचणी आणि त्यानंतर लेखी परीक्षेला सामोरे जावे लागणार आहे. ही विक्रमी अर्जसंख्या लक्षात घेता, पुणे शहर पोलीस दलाची भरती प्रक्रिया प्रशासनासाठी एक मोठे आव्हान असणार आहे.