Pune Ring Road: पुणेकरांनो, ट्रॅफिक जॅममधून सुटका होणार! रिंगरोडच्या कामाचा 'टॉप गिअर'; मोठी अपडेट समोर

पुणे बाह्य रिंगरोडचे काम पूर्व आणि पश्चिम अशा दोन भागात विभागले गेले आहे. पावसाळा संपल्याने कामाचा वेग वाढवण्यात आला असून, मे महिन्यापर्यंत प्रमुख टप्पे पूर्ण करण्याच्या सूचना देण्यात आल्या आहेत. पश्चिम टप्पा डिसेंबर २०२७ पर्यंत पूर्ण होण्याचे संकेत आहेत. तर, पूर्व टप्प्याचे काम पूर्ण होण्यासाठी मे २०२८ पर्यंतचा कालावधी लागण्याची शक्यता आहे.

नव्या निविदा आणि बदललेले नियोजन: रिंगरोडच्या एकूण लांबीपैकी ३१ किलोमीटरच्या कामासाठी महामंडळाने नव्याने निविदा प्रक्रिया राबवली आहे. यापूर्वी नगर रस्ता ते सोलापूर रस्ता आणि पुढे पुणे-बेंगळुरू हायवेला जोडणाऱ्या या ३१ किमीच्या पट्ट्याचे काम नॅशनल हायवे अथॉरिटी (NHAI) करणार होती. मात्र, आता हे काम पुन्हा 'एमएसआरडीसी'च करणार असल्याचे निश्चित झाले आहे. या ३१ किमीच्या पट्ट्याचे काम लवकरच प्रत्यक्ष सुरू होणार असल्याची माहिती अधीक्षक अभियंता राहुल वसईकर यांनी दिली.

पूर्व टप्प्यात 'एनएचएआय'कडून पुणे-संभाजीनगर ग्रीन कॉरिडॉरचे काम प्रस्तावित आहे. या प्रस्तावित रस्त्याचा आणि रिंगरोडचा काही भाग एकाच मार्गिकेवरून जात असल्याने नियोजनात काही बदल करण्यात आले होते. मात्र, आता संपूर्ण रिंगरोडचे नियंत्रण महामंडळाकडेच राहून २०२८ पर्यंत संपूर्ण रिंगरोड वाहतुकीसाठी सज्ज करण्याचा प्रशासनाचा मानस आहे.